-->

5/24/2022

للإناث الولوج سلك تلاميذ ضباط الصف (الصحة العسكرية) لسنة 2022 - فقط 1.60 طول

مـبـاراة ولوج سلك تلاميذ ضباط الصف (الصحة العسكرية)

أعلنت المدرسة الملكية للأطر الشبه الطبية للالة مريم (ERPPLM) بالرباط مـبـاراة الولوج لسلك تلاميذ ضباط الصف (الصحة العسكرية) لسنة 2022.

مـبـاراة ولوج سلك تلاميذ ضباط الصف (الصحة العسكرية)

شروط الترشيح في مباراة

المباراة لفائدة الشبان المغاربة

-أعمارهم ما بين 18 و23 سنة.

- الحالة العائلية عازبة.

- بدون سوابق عدلية.

- أن يكون المرشحة حاصلة على شهادة البكالوريا دورات 2020 أو 2021 أو 2022.

- التمتع بصحة جسمانية جيدة.

- أن يكون المرشحة قد تلقى التلقيح ضد فيروس كوفيد-19 .

مـبـاراة ولوج سلك تلاميذ ضباط الصف (الصحة العسكرية)

- القامة 1,60 متر على الأقل بالنسبة للإناث.

- أن يتم قبولها من طرف لجنة الانتقاء الأولي.

مـبـاراة ولوج سلك تلاميذ ضباط الصف (الصحة العسكرية)

يتعين على المرشحات المتوفرين على جميع الشروط أعلاه، تسجيل طلباتهم على هذا الموقع الالكتروني الخاص بالقوات المسلحة الملكية وذلك قبل 06 يونيو 2022 كآخر أجل لقبول الترشيحات.

رابط التسجيل

مراحل المباراة:

يتم القبول عن طريق مباراة وطنية وتجري على ثلاث (3) مراحل، كما يلي :

مرحلة الأولى :

إنتقاء أولي مبني على نقاط العامة لدورة الأولى و الثانية للسنة الأولى بكالوريا و للدورة الأولى للسنة الثانية بكالوريا

المرشحات اللواتي سيجتازون بنجاح هذه الاختبارات، سيتم ترتيبهم إعتماد على معدل النجاح الحاصل عليه في الدورة العادية في إمتحان البكالوريا.

بعد الانتقاء تمتد باقي الاختبارات كما يلي:

المرحلة الثانية :

تهم المترشحين الذين تم انتقاؤهم في المرحلة الأولى، وتشمل ما يلي :

1-فحص طبي 

 فحصا طبيا شامل، يجرى من طرف المصالح الطبية العسكرية المغربية وجميع المصاريف تكون مجانية.

2-اختبار رياضي 

اختبارات للكفاءة البدنية (معامل : 5)، وتتضمن سباقا إجباريا في مسافة 1000 متر بالنسبة لجميع المترشحين (*)؛

3-اختبار البسيكو-تقني Test Psychotechnique

(*) : كل نقطة في اختبارات الكفاءة البدنية تقل عن 5 من 20 تعد موجبة للإقصاء من المباراة.

المرحلة الثالثة :

تهم المترشحين المتفوقين في المرحلة السابقة، وتشمل اختبارات كتابية في المواد الدراسية.

                       معلومات عن  المدرسة الملكية(ERPPLM)

معلومات عن  المدرسة الملكية(ERPPLM)


الإسم الكامل للمؤسسة:

المدرسة الملكية للأطر الشبه طبية لالة مريم (ERPPLM) الرباط

ERPPLM - l'Ecole Royale Militaire Du Personnel Paramédical Lalla Meryem

تقع المدرسة :
العنوان: Groupe A, Av. Assanaoubar, Rabat
الهاتف:212661943990+ / 0537715537


اكتب ERPPLM - Ecole Royale Militaire Du Personnel Paramédical Lalla Meryem في البحت لمعرفة العنوان 

معلومات عن مدرسة الملكية للأطر الشبه الطبية للالة مريم 

هي مدرسة خاص بتكوين ضباط  صف الصحة العسكرية (ذكور و إناث).
تابعة للقوات المسلحة الملكية المغربية، توفر التكوين الأولي والمستمر للممرضين التابعين للقوات المسلحة الملكية، وكذا لفائدة الدول الصديقة في إطار التعاون العسكري. وتمتد فترة التكوين 3 سنوات في التخصصات الطبية وشبه الطبية.
وينتهي التكوين بهذه المؤسسة بالحصول على رتبة رقيبة.

نظام التكوين :
مؤسسة داخلي عسكرية+ راتب شهري.

مدة التكوين : ثلاث سنوات
مـبـاراة ولوج سلك تلاميذ ضباط الصف (الصحة العسكرية)

السنة الأولى:

 تكوين أساسي عام وشامل يتوج بالحصول على  شهادة الأهلية التقنية رقم 1 

–Certificat d’Aptitude Technique N°1 ou équivalen 

السنة الثانية: 

الحصول على شهادة الأهلية التقنية رقم 2 وتحضير الشهادة المشتركة للقوات المسلحة 

–Certificat Interarmes ou équivalent

متبوعة بتدريب تطبيقي على مستوى وحدات القوات المسلحة، الأسلحة والخدمة.

السنة الثالثة:

الحصول على الشهادة المشتركة للقوات المسلحة أو ما يعادلها والشهادة الأولية متبوعة بتدريب تطبيقي بمنطقة للعمليات.

4/25/2020

واش فيك الانوثة ؟ دخلي تعلمي كيفاش تولي كلك الانوثة 💖

كيفاش تخلي الأنوثة كتقطر منك؟

الى كنتي مهتمة بموضوع الانوثة وكتبغي تبرزيها فشخصيتك فقراي هادشي.
ليوم جيتكم بموضوع جديد لي هو الانوثة
كلنا بنات ولكن واش كلنا كنملكوا صفات الانوثة ؟ 
الجواب ببساطة لا , كاينين بنات حس الانوثة معندهمش وكاينين بنات لي الانوثة ديالهم مبالغ فيها وكتبان انوثة مصنعة .
مما يعني بلي الانوثة درجات غادي نتكلم ليكم على 3 درجات من الانوثة وغادي نطرق ليكم لبعض الأشياء لي كيديروهم البنات وكيكونو غلط.
🌸الدرجة الاولى : اولا احبييتي خاصكي تعرفي بلي الانوثة ماشي فقط لباس و وجه... الانوثة شي حاجة لي كتجمع ليا كل ما كاين فبالك دبا فمثلا  الابتسامة تعتبر معيار للانوثة باش تكون ابتسامتك انثوية خاصها تكون خفيفة واهم حاجة متكونش مصنعة . الضحكة هي البنت لي كتضحك بصوت خفيف ماشي تسمعها لگاع الناس. صوت خفيف ويلا كنتي ميتا بالضحك وكتاكلي مثلا . فاكيد ديري يديك على فمك بطريقة زوينة . ايضا فطريقة المشيا ديالك ماشي كتمشاي كي دراري .
ديما خاصك تكوني واقفة مستقيمة وراسك طالع شوي (ماشي تشوفي فالسماء ههه) وملي يكون شي دري او راجل دايز من حداك تفادي دوك النظرات نزلي عينيك .
فقط هكا كتبرزي شخصيتك اكثر بالنسبة ليه ايضا كلام ديالك والادب ديالك بغيتي شي حاجة قولي عافاك واش ممكن.... ماشي عطيني... عيب جاك اتصال ونتي بالقرب من اصدقاءك استأذني منهم (سمحولي بغيت نجاوب).
ايضا الانثى هي فتاة مكتخسرش الكلام عيب وعار بنت كتخسر الكلام هادا اكبر غلط كديروه ومنساوش ملي نكونو مقلقين من شي حد او وحدة ومعصبة منهم. لا داعي انك تكلمي معاهم فداك الوقت لي كتكوني نتي معصبة خليك بالرقي ديالك .
قولي ليهم ببساطة مبغيتش نتكلم فالموضوع تفادايهم حتى تبردي اعصابك ورجعي تكلمي معاهم بكل برودة دبا غادي نجي ونتكلمو على طريقة اللبس ديالك كيفاش غادي تبرز ليك الانوثة لي كتملكيها (اي بنت كتملك الانوثة فقط كاين لي كتوظفها وكاين لي لا).
اولا لباسك حاولي ديما يكون سامبل ايلا كانو الوان داكنة حاولي تفاداي كترت الزواق والالوان او ايلا كانو الوان فاتحة ديما كسريهم بشي لون يكون غامق شويا وقد ما كانو الالوان لي كتعتامدي عليهم باردين قد ما كنتي كتباني هادئة اكثر .....
ايضا حبيبتي خاصكي تكوني هادئة. قد ما كنتي هادئة . قد ما كنتي اجمل وأرقى واكيد الرقي هي الدرجة الثانية لي غادي نتكلم عليها اليوم وغادي نجاوبوا على السؤال التالي:
🌸كيفاش نكون أنثى راقية : اولا لي خاصكي تعرفي ان الرقي عمرو مكان متعلق بالفلوس والمصادر المالية ديالك . وكمثال على ذلك احيانا غادي تشوفي بنات عندهم فلوس او لباس عليهم ومكيعرفو لا يتصرفو لا يلبسو لا والو واكيد كاين العكس ، مما يعنى انه خاصكي تكوني راقية فتصرفاتك كأنثى طريقة الكلام ديالك الهادئة . تلخص انك راقية اختياراتك لابسط الاشياء ايضا ،مثلا المكان لي كتجلسي فيه هادئ الابتعاد على الضجيج . اذ يعتبر من ابرز النقاط لي كتبينك ناضجة كيما غادي ايبان ليكم فهاد الدرجة كتكوني اقتنعتي انك انثى.
النقط الثانية هي خاصكي ماشي فقط تكوني انثى قدام الناس بل حتى مع نفسك. وباش تحققي هاد النقطة البسيطة تهلاي فراسك بداكشي لي متوفر عندك. واهم حاجة النظافة ديالك وريحتك.. 
على ذكر الرائحة غادي نقوليك واحد الغلط كيديروه البنات ولي هو كيختارو رائحة قويا نصيحة تفاداي هاد الغلط ريحتك خاصها تكون خفيفة (غادي نحط ليكم بوسط ديال حقيبة الانوثة فيه المنتوجات لي جربت وغادي نعاود نشريهم).
 وعافاكم ريحة العرق لا ثم لا ثم لاااااااا.
ميمكنش كنشوف بنات قتقراو فالجامعة او الثانوي وريحة العرق فيها .كتكرهك فيهم واخا تكون كتملك جميع المواصفات ريحتها كتكرهك فيها ،ايلا كنتي معگازة 2 مرات فالسيمانة على الاقل استحمي واستعملي منتوجات تكون فيها رائحة زوينة وخفيفة.
كنركز على خفيفة ايضا ايلا كنتي كتحطي مكياج فحاولي يكون خفيف ماشي عكر فلگرونة لا غوز بارد كنتي سمراء ديري دتك القهيوي فاتح.... (غادي نديرليكم بوسط اساسيات المكياج) وآخر نقطة غادي نطرق ليها وهي اهم نقطة غادي نختم بيها كيما كيقولوا ختامها مسك الرقي بالاضافة لكل ما قيل هو رقي 
الفكر وهذا هو الاهم باش تكوني فتاة راقية خاصكي تقراي الكتب وقد ما قريتي قد ما اصبحت شامخة قد ما زادت الثقافة ديالك قد ما زاد مستوى الرقي ديالك حبيبتي... ولي اهم من ذلك التواضع قد ما كنتي متواضعة قد ما كنتي انثى هذا هو السبب لي كيخليني نقوليكم بلي الانثى هي فتاة اقتنعت انها انثى وتملك من الحكمة ماتملكه.
🌸وكآخر درجة غادي نطرق ليها هي : الانوثة المبالغ فيها : الانوثة قد ما كانت عفوية قد ما كانت اجمل وملي كتولي مبالغ فيها و مصنعة. كتنعاكس فهاد النقطة بغيتك نتي لي كتقراي تعكسي اي حاجة قلتها وغادي تفهمي ان الانوثة ديالك اصبح مبالغ فيها مثال: ضحكة مصنعة باش تباني انثى كتدل على انك فالاصل مبغيتيش ضحكي او كضحكي فوق قلبك.
مثال 2 : صوتك كترققيه بزاف كتباني بمصطلح المغربي فيك العياقة..... بالإضافة لهادشي لي قلت غادي نقوليكم بلي الانثى هي فتاة بكل معنى الكلمة فتاة نضجات واصبحت تفرق بين الصالح والطالح.
كنتمنى أنكم استافدتو وتفاعلوا معايا راه هدش يخدا مني وقت متبخلوش عليا بتعليق

4/16/2020

قصة هاينة و الغول بلهجة مغربية - جزء الثاني


قصة هاينة و غول الجزء الأول كاملة,قصة هاينة والغول
ﻫﺎﻳﻨﺔ ﻛﺎﻧﺖ ﻣﺨﻄﻮﺑﺔ ﻟﻮﻟﺪ ﻋﻤﻬﺎ ﺍﻟﻠﻲ ﻣﺸﺎ ﻟﻠﺤَﺮْﻛَﺔ، ﻣﻨﻴﻦ ﺭﺟﻊ ﻣﺎﻟﻘﺎﻫﺎﺵ ﻭ ﺳﻮّﻝ ﻋﻠﻴﻬﺎ ﺃﻣﻬﺎ ﻭ ﺃﻣّﻮ ﻓﻴﻦ ﻣﺸﺎﺕ ؟
ﻭ ﺟﺎﻭﺑﺎﺗﻮ ﺃﻣﻬﺎ ﺍﻧﻬﺎ ﻣﺎﺗﺖ... ﻭ ﻃﻠﺐ ﻣﻨﻬﻢ ﺍﻧﻬﻢ ﻳﻨﻌﺘﻮﻩ لقبرها، ﻭﻧﻌﺘﻮﻩ لواحد لقبر ﻣﺠﻬﻮﻝ ﻣﺎ معروفينش ﻧﺎﺳﻮ . ﺑﻨﻰ ﻋﻠﻴﻪ ﺍﻟﺤﺒﻴﺐ ﺧﻴﻤﺘﻮ ، ﺗﻤﺎ ﻣﺎﻛﻠﺘﻮ ﻭ ﺗﻤﺎ ﺷﺮﺍﺑﻮ ﻭﻧﻌﺎﺳﻮ... ﻣﺮﺕ ﺍﻻ‌ﻳﺎﻡ ﻭ ﺍﻟﻠﻴﺎﻟﻲ ﻭ ﻓﻲ ﺍﻟﻠﻴﻠﺔ ﺍﻟﺜﺎﻟﺜﺔ ﺟﺎﺗﻮ ﺍﻣﺮﺃﺓ ﻛﺒﻴﺮﺓ ﻓﻲ ﺍﻟﺴﻦ ﻣﺎ ﻋﺮﻓﻬﺎ ﻭﺍﺵ ﺍﻧﺲ ﺍﻭ ﺟﻦ ﺧﺎﻃﺒﺎﺗﻮ ﺑﺎﻟﻜﻼ‌ﻡ ﺍﻟﻤﻔﻬﻮﻡ : ﻭ ﺍﻟﻤْﻘَﻴّﻞ ﻋﻼ‌ﺵ ﻣْﻘَﻴّﻞ ﺗﻤّﺎ ؟ ﺭﺍﻙ ﻣْﻘَﻴّﻞ ﻋﻠﻰ ﺧَﺰْﻧَﺔ ( ﻛﻨﺰ ﻣﺪﻓﻮﻥ ) ﺍﻣﺎ ﻫﺎﻳﻨﺔ ﺧﺬﺍﻫﺎ ﺍﻟﻐﻮﻝ ...
وعاودتها لو وعاودتها لو . حتى
ﺩﺧﻞ ﺍﻟﺸﻚ و الوسواس ﻭﻟﺪ ﻋﻤﻬﺎ ﻣﺎ ﺑﻘﻰ داه ﻧﻌﺎﺳﻮ ﻭ وتخمام ﻓﻲ ﻛﻼ‌ﻡ ﺍﻟﺸﺎﺭﻓﺔ ﻫﺮﺱ ﻟﻴﻪ ﺭﺍﺳﻮ ... ﻭﻗﺮﺭ ﻳﺮﺟﻊ ﻟﺪﺍﺭﻫﻢ. ﻛﻴﻒ ﺷﺎﻓﺘﻮ ﺍﻟﻤﻴﻤﺔ ﺟﺎﻱ ﻋﻠﻰ ﺣﺼﺎﻧﻮ ﺑﺪﺍﺕ ﺗﺰﻏﺮﺩ ﻭ ﺗﻘﻮﻝ " ﺳﻌﺪﻱ ﺑﻮﻟﻴﺪﻱ ﺭﺟﻊ ﻟﻴﺎ " ... ﺩﺧﻞ ﻟﻠﺪﺍﺭ ﻭ ﻃﻠﺐ من ميمتو ﻄﻴﺐ ﻟﻴﻪ
 "ﺑﺮﻛﻮﻛﺶ" ﻭ تعطيه ﻟﻴﻪ ﻓﻲ ﺯﻻ‌ﻓﺔ ﻭ يكون ﻣﺎﺯﺍﻝ ﻃﺎﻳﺐ ﺳﺨﻮﻥ و عافيا منو تغوت...
ﻭ ﻣﻦ ﻓﺮﺣﺔ اﻣﻮ ﺑﺮﺟﻮﻋﻮ ﻣﺎ ﺭﻓﻀﺖ ﻟﻴﻪ ﺍﻟﻄﻠﺐ ﻭ ﻗﺎﻣﺖ ﺑﺎﻟﻮﺍﺟﺐ ، ﻭ ﺟﺎﺑﺖ ﻟﻴﻪ ﺑﺮﻛﻮﻛﺶ ﺳﺨﻮﻥ ﻳﻔﻮﺭ ... ﻭ ﻟﻜﻦ هو لي فراسو فراسو فبلاصة ما ياكلو. ﺷﺪ ﻳﺪ ﻣﻴﻤﺘﻮ ﻭﺣﻄﻬﺎ ﻭﺳﻂ ﺍﻟﺰﻻ‌ﻓﺔ سخونة ﻭ ﻗﺎﻝ ﻟﻴﻬﺎ " ﺩﺍﺑﺎ ﻗﻮﻟﻲ ﻟﻲ ﻓﻴﻦ مشات ﻫﺎﻳﻨﺔ ؟" ؛ ﺟﺎﻭﺑﺎﺗﻮ ميمتو: ﺍﻃﻠﻖ ﻣﻨﻲ ﺍﻭﻟﻴﺪﻱ ﺭﺍﻧﻲ ﺗﺤﺮﻗﺖ ﻭ ﻧﻘﻮﻝ ﻟﻴﻚ ﻓﻴﻦ ﻣﺸﺎﺕ ﻫﺎﻳﻨﺔ ﺍﻟﻠﻪ ﻳﺮﺿﻲ ﻋﻠﻴﻚ...
ﻭ ﺣﻜﺎﺕ ﻟﻴﻪ ﻗﺼﺔ ﺍﻟﻐﻮﻝ ﻭ ﺍﻟﻠﻲ ﻭﻗﻊ... ﺳﺮﺝ ﺍﻟﺤﺒﻴﺐ ﺣﺼﺎﻧﻮ ﻭ ﺟﻤﻊ ﻋﺘﺎﺩﻭ ، ﻭ ﺧﺬﺍ ﻣﻌﺎﻩ ﻓﻲ ﺭﺣﻠﺔ تقلاب على هاينة. ﻗﻔﺔ ﻣﻦ ﺍﻟﻤﻠﺢ ﻭ ﻗﻔﺔ ﻣﻦ المواس (ﺍﻟﺴﻜﺎﻛﻦ) ﻭ ﻗﻔﺔ ﻣﻦ ﺍﻟﻤﺨﺎﻳﻂ ﻭ ﻗﻔﺔ ﻣﻦ ليباري (ﺍﻹ‌ﺑﺮ)... ﻭ ﺷﺪ ﺍﻟﻄﺮﻳﻖ 
ﻭﺻﻞ ﻋﻠﻰ ﺍﻟﻜُﺪْﻳَﺔ ﺍﻟﻜﺤﻠﺔ (التل لونه أسود) ﻭﻗﺎﻝ : ﺁ ﺍﻟﻜﺪﻳﺔ ﻣﺎﻟﻚ ﺗﻜﺤﺎﻟﻲ ﻭﺗﺰﻳﺪﻱ ﻓﻲ ﺍﻟﻜﺤﻮﻟﻴﺔ ؟
ﺟﺎﻭﺑﺎﺗﻮ لكدية: ﺑﺎﻟﺴﻴﻒ ﺁﻭﻟﺪﻱ ﻣﺎ ﻧﻜﺤﺎﻝ ﻭﻧﺰﻳﺪ ﻓﻲ ﺍﻟﻜﺤﻮﻟﻴﺔ ﻭﻫﺎﻳﻨﺔ ﺩﺍﺯﺕ ﻋﻠﻴﺎ ....
ﻭﺻﻞ ﻋﻠﻰ ﺍﻟﻜُﺪْﻳَﺔ ﺍﻟﺰﺭﻗﺎﺀ ﻭ ﻗﺎﻝ : ﺁﺍﻟﻜﺪﻳﺔ ﻣﺎﻟﻚ ﺗﺰﺭﺍﻗﻲ ﻭ ﺗﺰﻳﺪﻱ ﻓﻲ ﺍﻟﺰﺭﻭﻗﻴﺔ ؟ 
ﺟﺎﻭﺑﺎﺗﻮ : ﺑﺎﻟﺴﻴﻒ ﻣﺎ ﻧﺰﺭﺍﻕ ﻭ ﻧﺰﻳﺪ ﻓﻲ ﺍﻟﺰﺭﻭﻗﻴﺔ ﻭ ﻫﺎﻳﻨﺔ ﺩﺍﺯﺕ ﻋﻠﻴﺎ ...
ﻭﺻﻞ ﻋﻠﻰ ﺍﻟﻜُﺪْﻳَﺔ ﺍﻟﺼﻔﺮﺍﺀ ﻭ ﻗﺎﻝ : ﺁﺍﻟﻜﺪﻳﺔ ﻣﺎﻟﻚ ﺗﺼﻔﺎﺭﻱ ﻭ ﺗﺰﻳﺪﻱ ﻓﻲ ﺍﻟﺼﻔﻮﺭﻳﺔ ؟
ﺟﺎﻭﺑﺎﺗﻮ : ﺑﺎﻟﺴﻴﻒ ﻣﺎ ﻧﺼﻔﺎﺭ ﻭ ﻧﺰﻳﺪ ﻓﻲ ﺍﻟﺼﻔﻮﺭﻳﺔ ﻭ ﻫﺎﻳﻨﺔ ﺩﺍﺯﺕ ﻋﻠﻴﺎ ...
بقا ﻭﻟﺪ ﻋﻤﻬﺎ ﻋﻠﻰ ﻫﺎﺫ ﺍﻟﺤﺎﻝ ﺣﺘﻰ ﻭﺻﻞ ﻟﻠﻜﺪﻳﺔ ﺍﻟﺒﻴﻀﺎﺀ ﻭ ﻗﺎﻝ : ﺁ ﺍﻟﻜﺪﻳﺔ ﻣﺎﻟﻚ ﺗﺒﻴﺎﺿﻲ ﻭ ﺗﺰﻳﺪﻱ ﻓﻲ ﺍﻟﺒﻴﻮﺿﻴﺔ ؟
ﺟﺎﻭﺑﺎﺗﻮ : ﺑﺎﻟﺴﻴﻒ ﻣﺎ ﻧﺒﻴﺎﺽ ﻭ ﻧﺰﻳﺪ ﻓﻲ ﺍﻟﺒﻴﻮﺿﻴﺔ ﻭ ﻫﺎﻳﻨﺔ ﺳﺎﻛﻨﺔ ﻓﻴﺎ !
ملي سمع ولد عم كلام الكدية . ﻧﺰﻝ ﻭﻟﺪ ﺍﻟﻌﻢ ﻣﻦ ﻋﻠﻰ ﺣﺼﺎﻧﻮ على أﻣﻞ ﺍﻧو ﻳﻠﻘﻰ ﻫﺎﻳﻨﺔ ﻓﻲ ذاك ﺍﻟﻤﻜﺎﻥ ... ﺑﻘﻰ ﻳﺴﻮﻝ ﺍﻟﻠﻲ ﻟﻘﻰ ﻣﻦ ﺍﻟﻨﺎﺱ ﻋﻠﻰ ﻓﻴﻦ ﺳﺎﻛﻨﺔ ﻫﺎﻳﻨﺔ ﻭ ﻛﻠﻬﻢ ﺗﻴﻘﻮﻟﻮ ﻟﻴﻪ "ﻫﺎﻳﻨﺔ ﺍﻟﻠﻲ ﺗﺰﻭﺟﻬﺎ ﺍﻟﻐﻮﻝ!؟ " ولكن راه ﺣﺘﻰ ﻭﺍﺣﺪ ﻣﺎ ﻳﻘﺪﺭ ﻳﻘﺮﺏ ﻟﻤﻜﺎﻥ لي ﺳﻜﻦ ﺍﻟﻐﻮﻝ! ولكن كيف مكان الحال الناس
ﻧﻌﺘﻮ ليه ﺍﻟﻤﻜﺎﻥ .ﻭﺻﻞ ﻟﺪﺍﺭ ﺍﻟﻐﻮﻝ ودارت بيه دنيا معرف لا ﻣﻨﻴﻦ ﻳﺪﻭﺯ ﺑﺎﺵ ﻳﺸﻮﻑ ﻫﺎﻳﻨﺔ ؟ لا ﻛﻴﻔﺎﺵ ﺑﺎﺵ ﻳﺘﻜﻠﻢ معاها ؟ 
فواحد وقيت خرج من دار لغول واحد فروج.وغير شافو ولد العم و هو يغوت عليه و ﺳﻮﻟﻮ : ﺍفروج قوليا ﺷﻨﻮ كدير ﻫﺎﻳﻨﺔ ؟ 

ﺟﺎﻭﺑﻮ ﺍﻟﻔﺮﻭﺝ : ﻫﺎﻳﻨﺔ ﻏﺴﻼ‌ﺕ ﺍﻟﺼﻮﻑ ﻭ ﺗﺘﻨﺸﺮﻫﺎ ﺑﺎﺵ ﺗﻨﺸﻒ !
ﻗﺎﻝ ﻟﻴﻪ ﻭﻟﺪ ﺍﻟﻌﻢ : ﺳﻴﺮ ﻛﻠﻤﻬﺎ ﻟﻴﺎ ، ﻟﻒ ﺍﻟﺼﻮﻑ ﻋﻠﻰ ﺭﺟﻠﻴﻚ ﻭﺧﺮﺝ ﺗﺠﺮﻱ ﻋﻨﺪﻱ ﻭ ﻫﻲ ﻏﺎﺩﻱ ﺗﺘﺒﻌﻚ ...

ﻭ ﻫﺎﺩﺷﻲ ﺍﻟﻠﻲ ﻛﺎﻥ لوا لفروج صوف على رجليه وشدها بجرية وحدة تال  ﻋﻨﺪ ﻭ ﻟﺪ ﻋﻤﻬﺎ ﻋﺎﺩ ﻭﻗﻒ ، ﻭ ﻛﻴﻒ ﺷﺎﻓﺘﻮ ﻫﺎﻳﻨﺔ ﻗﺎﻟﺖ ﻟﻴﻪ: ﺍﻧﺎﺭﻱ ﻳﺎ ﻭﻟﺪ ﻋﻤﻲ ﺍﺷﻨﻮ ﺟﺎﺑﻚ ﻭ ﻛﻴﻒ ﻧﺪﻳﺮ ﻟﻴﻚ ؟ ﺍﻟﻐﻮﻝ ﻳﺮﺟﻊ ﻣﻦ ﺍﻟﺼﻴﺪ ﻳﺸﻢ ﺭﻳﺤﺘﻚ ﻭ ﺍﺫﺍ ﻟﻘﺎﻙ ﻳﺎﻛﻠﻚ ... ﺍﻟﻴﻮﻡ ﻻ‌ ﺃﻧﺖ ﻭ ﻻ‌ ﺃﻧﺎ ﻳﺎ ﻭﻟﺪ ﻋﻤﻲ ...
الجزء الأخير قريبا على موقع الأنثى المغربية
لبغات تقرا الجزء الاول 
قصة هاينة و الغول بدارجة مغربية - جزء الأول

قصة هاينة و الغول بلهجة مغربية - جزء الثالت

متنسايش تشاركي هد قصة مع الناس لي عزاز عليك باش حتا هما يتفكرو يام زمان و طفولة. ↓↓↓↓

قصة هاينة و الغول بدارجة مغربية - جزء الأول

قصة هاينة و غول الجزء الأول كاملة,قصة هاينة والغول


" هاينة و الغول " او "هاينة الكلبة المسحورة"

بسم الله من تاني حكايتي بديت

بديتها بالصلاة على النبي العدنان محمد عليه الصلاة و السلام

اللي من الصلاة و السلام عليه ما مليت.

كان حتى كان ، كان الله في كل مكان ، و كان الحبق و السوسان في حجر النبي العدنان... كانوا الناس يعيشوا في امان و يحطبوا الحطب لدوير الزمان... هاذو سبع بنات رسلوهم عائلاتهم يحطبوا الحطب و كانت بينهم وحدة زينة اسمها " هاينة " ، و كيفما هو معروف خاصهم يرجعو لمنازلهم قبل مغيب الشمس خوفا من مجيئ الغول...

و بينما البنات تيجمعوا الحطب كل وحدة فيهم لقات شي حاجة ، وحدة لقات دبليج و وحدة لقات خاتم و وحدة لقات مِشْط و وحدة لقات عِقد ... الاّ هاينة لقات مشهاب او محماش ( قطيب) !!

جمعوا البنات الحطب في رزيمات و كل وحدة حملت الرزمة ديالها على كتافها و شدوا الطريق راجعين لمنازلهم ، و لكن "هاينة" كانت في كل خطوة كتمشيها كَتْحَل ليها رزمة الحطب و يرجعوا البنات باش يعاونوها في حزمها و يكملوا الطريق، وكانت الرزمة تُفتَح من جديد و يعاونوها من ثاني حتى قرب مغيب الشمس. و هنا البنات خافوا على راسهم و كملوا طريقهم بلا مايلتافتوا ل"هاينة" ... و هي مازال مشغولة مع الرزمة جات ريح قوية ، كان وراءها ما لا تتمناه، كان الغول !!

عاونها في عقد الرزمة و حط "المشهاب" في العقدة و قال ليها : نهار تجي الشتا و الريح و النفانف و نقول ليك آهاينة مدّي المشهاب ، مدّيه ليا ...

و رجعات " هاينة " مرعوبة و باكية للدار ، سولاتها امّها مالها ؟ و حكات ليها اللي وقع مع الغول ... و لكن أمها طمأنتها و قالت ليها : ما عاندك مناش تخافي ، حايرة غير فيه !!
مرت ايام و ايام ... و في يوم كانت فيه ريح قوية و النفانف ( صفير الرياح عبر الابواب و النوافذ... ) و الشتا خيط من السما ، جا الغول كيف وعد هاينة ، و قال ليها : وآ هاينة مدّي المشهاب. 
كيف سمعاتو هاينة ترهبات و ترعبات و قالت لأمها : ناري يا أمي و الغول جا اشنو ندير ؟
قالت ليها أمها : قولي ليه تمدّو ليك أمي .
جاوبات هاينة الغول : تمدّو ليك أمي !
قال ليها : يعطيك الغمة لا أنت و لا هي ... وآ هاينة مدّي المشهاب .
جاوباتو: تمدو ليك أختي !
قال ليها : يعطيك الخوا لا أنت و لا هي... وآ هاينة مدّي المشهاب .
جاوباتو : تمدّو ليك خالتي !
قال ليها : يعطيك الخلا لا أنت و لا هي ... وآ هاينة مدّي المشهاب .
جاوباتو : تمدو ليك عمتي !
قال ليها : يعطيك العمى لا أنت و لا هي ... وآ هاينة مدّي المشهاب .
و فكرت أم هاينة في فكرة و قالت ليها : آبنتي ركبي على ظهر الخادم و تغطاي و مدي ليه المشهاب.. و الغول ما يقدرش يخطف الخادم ...
وهاذ الشي اللي كان ركبت هاينة على ظهر الخادم و عطاتو المشهاب و لكن الغول كان ذكي و ما دارتهاش بيه الحيلة ، اخذ المشهاب و غرسو في عين الخادم و خطف هاينة من ظهرها و مشا ... الخادم مسكينة ما بيدها حيلة رجعات لعندهم تبكي و تصرخ و تقول : لالة مشات ، عيني عمات... لالة مشات ، عيني عمات... لالة مشات ، عيني عمات...

وخبيرتي خليتها هنا ، الجزء الثاني.

قصة هاينة و الغول بلهجة مغربية - جزء الثاني
قصة هاينة و الغول بدارجة مغربية - جزء الثالت

متنسايش تشاركي هد قصة مع الناس لي عزاز عليك باش حتا هما يتفكرو يام زمان و طفولة. ↓↓↓↓

4/09/2020

كيفاش نخليه يفكر يتزوج بيا (خاص بمصاحبين)

سلام عليكم أيتها الانثى المغربية يوم فهد موضوع غدي نقوليكم طرق تخلي دري لي مصاحب معاه يفكر يجي يتزوج و يفكر بيك كمراتو.
أول نتفاهمو على واحد حاجة اغلبية رجال الا مقلناش كلشي . باش كيتصاحبو مع شي وحدة فلول مكيكونوش ناويين حلال و مناوينش يتزوجو بيها . راه واخ يقوليك نتي حلالي و ناوي نتزوج بيك و كنشوفك مراتي راه غير كيكدب عليك . راه دراري ولاو عايقين بلي بنات كيدوخهم الزواج هدشي لاش كيدخلو بهد الدخلة  و كيبقاو يتعاملو معاك على هد اساس اما نواياهم حقيقة شيء اخر .
كيف أجعله زوجي

و هنا فين غيجي الدور ديالك لي هو تخليه يفكر فيك كزوجة مستقبلية ليه ويشوفك مراتو .ونزيدك الراجل راه فالداخل ديالو مستحيل بل من 7 مستحيلات يفكر فالزواج في بداية العلاقة. حيت دراري هكدا طبيعتهم . كيقوليك انا نتعرف على بنت فلول و نعرف شخصيتها و طريقة معاملتها ونشوف واش نتوافق معاه و عاد نفكر فالزواج بيها .
"بطبيعة الحالة مكنعممش كاين لي باغي غير يتزوج كيقلب على زين و فورمة و عائلة و كيمشي يتزوج تصدق ليه و لامتصدقش هانيا عدو مهيم هو عدو الفراش و ماكلة مزوج بخدامة و صافي "
معليناش نرجعو لموضوعنا دب حنا تنهضرو على بنات لي مصاحبين لي كيهضرو مع شي ولد و بغاو يتزوجو بيه.
غنقوليك خطوات صحيح تاع بنت مغربية الحرة لي تخلي اي راجل يفكر يتزوج بيك.
"هدشي غيصدق مع رجال مشي براهش"

1-قنعيه بلي نتي بنت الناس
-وياكي ثم وياكي تبيني لراجل لي نتي معاه. بلي راكي فايت مصاحبة و لا فايت داخل فشي علاقة غرامية . خصكي تقنعيه بلي راكي عمركي عرفتي شي راجل قبل منو وبلي هو الوحيد لي تعرفتي عليه فحياتك مهيم تقاتلي وقنعيه واخ يسولك و يعاودك وميتيقكش واخ تكوني نتي زوينة حيت دراري باش كيشوفو بنت زوينة ومهلي فراسها وفي مرحلة الشباب كيقولو ميمكنش تكون عمرها تصاحبات ...قنعيه بلي عمركي حسيتي و لا حبيتي شي واحد قبل منو مني غيسولك علاش عمركي متصاحبتي.
قول ليه كانو بزاف دراري كانو كيحاولو يتصاحبو معايا و لكن انا ديما كنت تنرفض معرفتش علاش نت وحيد لي مال ليه قلبي وحسيت بالامان معاه و حسيت بيك محترمني .قولي ليه انا مكنحسش بالامان غير مع بابا و خويا ولكن سبحان الله نت كنحس معاك بالامان معرفت علاش واش طاقة معرفتش هكدا كنحس باش كنكون معاك...دوي معاه بحال هكاا اكي.
حيت راه اكبر خطا تقدري ديري فحياتك هو تقولي لدري بلي راكي فايت مصاحب . حيت بوركابي المغربي مدخل فراسو بلي لبنت لي فايت مصاحب راه 100 % داير شي حاجة تاع حرام مع اكس ديالها وكاعم كتصلاح لزواج... وحتى لتزوجتو بيه راه ديما غيبقا يعايرك باكس ديالك هدشي لاش تجنبي نهائيا تعاودي ليه على ماضي ديالك لي فات مات نسايه عداكي تقولي مع راسك غنكسب عطفو و لاغتجيه غيرة ولا غنبين ليه بلي راني كانو كيهتمو بيها دراري قبلو...راه غير كتخربقي حيت  هدشي غيجي بنتائج سلبية عليك وغدي تخسريه ومن لخر غيولي يشوفك ق@@@  ونساي شي حاجة سميتها لحلال.

2-لفهامة عند لمرا نقمة
دراري كيكرهو بنت عايقة و فايقة مكيحسوش برجولتهم معاها نهائيا. راه واحد مثل مغربي كيقول "لفهامة عند لمرا نقمة"  راه رجال لفاهمين كيختارو زواج بمرا لي قلة عرف و فهامة باش يعيشو مرتاحين في علاقتهم الزوجية .حتى راجل معزيزش عليه نكير و كثرت لفهامة و لغيط خاوي هدشي كيدمر اي علاقة كيف مكانت.
شوفي راه واخ تكوني نتي كطيري مع طيور و عارف كاع تحراميات بيني ليه بلي راكي درويشة و بينك و بين تحرميات غير الخير والاحسان .
دوك نقاشات الحادة لي كتبغي تبيني فيهم قوتك وفهامتك عليه غير بعدي منهم حيت بكل بساطة هو كيحس بنقص وكيحس راسو ضعيف معاك .عمركي تحاولي طيحي بالراجل نهائيا ولاتحسيه بالضعف.

3-راجل مشي اوبن مايند
وياكي ثم وياكي ثو وياكي تعاودي لراجل على شي ولد و لا على شي قصة حب كانت فالماضي ديالك متحاوليش تباني عليه فهد المسائل حيت راجل مكينساش وراه مشي اوبن مايند هداك لي كيقوليك عادي عندي راه غير كيكدب عليك اختي راه راجل فهد المسائل تاع ولاد  كيولي معقد جدا جدا وخصوص راجل عربي راه هكدا تركيبة ديالهم.
3-كوني نية مكتفهمي والو فالحرام
ديما نتي معرفاش و خصوص تحراميات و حاجة حرام بيني ليه عمركي سمعتي بداكشي و لا عارفاه وخاصة الجنس وياكي طيحي فداك الفخ راه واخ تكوني شابع بوسان قولي ليه عمرني .
نتي مكتعرفي والو نتي نية باش تكوني مع راجل كوني طفلة يعني برائة راه رجال كيموت على هد نوع كيبان ليهم هد نوع صالح لزواج .رجال بطبعهم عزيز عليه وتيحماقو على لمرا قلة عرف و بريئة و ضريفة هو كيقول على بالو هدي ساهل نحكمها مغديش تخرج من طوعي .ولكن هو مفخباروش راكي مطبق داك مثل لي كيقول "تمسكني حتى تمكني ".
متحاوليش تبيني ليه راكي كتعرفي فشي حوايج مشي فكلشي .فشي حوايج خصكي تبيني ليه راكي دكية فيهم وليني باش تكوني معاه فشي حوايج بحال (علاقات , الجنس , عادة السرية  ,الشراب  ,لكارو , لحشيش , بزناس , شيشة ,لعرى , سخط وليدين , زناقي ,دراري ,تصاحيب ,تخصار الهضرة....) بيني ليه بلي راكي مكتعرفي والو فيهم.
راه هد تفاصيل صغيرة كيلعبو دور كبير في علاقتك معاه فكوني دكية و استغلي هدشي مزيان.

5-متبينيش ليه جانب مضلم منك
-نهار لي تكوني معصبة و معدكيش لكانة متلقايش معاه ومتهضريش معاه حيت طاقة السلبية غتوصلو و مغديش تكوني على طبيعتك و يقدر يبان واحد جانب منك يكرهو فيك .
-متكرهيهش فمستقبل معاك متقوليش ليه الا تزوجنا مغديش تبقا تخرج هههه غدي تخليه يكره زواج حاولي تخليه يحس بالامان و بلي ضروري خصو يتزوج بيك  خليه يحلم بنهار لي تكوني حلالي قولي ليه غنبقا نتهلا فيك و نحسن ليك فهمتي ههه خلقي ليه واحد مستقبل زوين مثالي . وعرفي شنو كيخلعو من زواج و طمأنيه .
6-ماماه هي سر
الا طرا وعرفك راجل بماماه و لا ختو عرفيه ناوي معقول حيت الأم عند مغارب شي حاجة مقدسة يعني راه كيفكر فيك بالمعقول ولكن هدشي مكيخليكش كي حيوانة و يلعب عليك كاين دراري لي مكيهمش الامر و عادي يعرف ماماه بالبنات لي كيهضر معاهم اوبن مايند . نتي ديما ديري احتياطك وصافي متكونيش ساهلة.
-كيفاش أصاحبتي يغدرني كنقولك عطاني مو هضرت معاها فتلفون وقاليها خودي دوي مع مرات ولدك 🙆🏻‍♀️🤦🏻‍♀️🤣🤣
مهيم راجل الا وراك لمو مشي هي يوريك لصاحبو كاين وفرق كبير . 
7-ستغلي ماماه باش تكسبي حبو 
وياكي تشري لكدوات لمامه قبل متكون شي حاجة رسمية و لكن غتشري ليها بطريقة غير مباشرة مثلا نفتارضو هو عرفك بماماه و لا عمرو عرفك عليها فحالتين هيجي غيقول ليك راه غد عيد ميلاد الوليدة و لاكاين شي مناسبة بحال عيد الام و لاعيد المراة مهيم شي حاجة خاصة بالمرأة ...نتي غتمشي تاخدي شي حاجة رمزية و نسطر على ديك رمزية عداكي تشري شي كادو غالي  تكون قيمتها قليل يعني عادية فالثمن على قد جيبك.
عداكي تعطيها ليها نتي و ياكي حتى لو كنتي كتلقاي معاها  . غدي تعطيها ليه هو وتقولي ليه : هدي عطيها لخالتي و لا طاطي ولا ماماك هدي من عدي ولين عافاك احياتي متقولش ليها راه من عندي عطيها ليها كأنك نت لي شريتيها ليها .
هد تصرف الى درتيه راكي واعرة حيت راجل كيف مكان عندو واحد رابط مع الام ديالو كيف مكانت . نتي الا بينتي ليه انكي كتهتمي بعلاقة لي بينو و بينها و بغا تقربيه لماماه هدشي كيخليه يشوفك تصالحي تكوني زوجة ليه.
وتيقي بيا الا قتليك بلي راه غدي يقول ليها بلي فلانة لي جابتو ليك واخ غدي يواعدك مغديش يقولها ليها وهنا غتكوني ضربتي عصفورين بحجر واحد هو و ماماه .
نتوم عارفين بلي بوركابي ديما عندهم داك حاجز تاع الام و كيقول بغيت غير شي مرا تهلا ليا فالوليدة.
8-كوني متبة و مرزنة
باش تكوني معاه وياكي تكوني خفيفة و كطيري من مقلة . كوني ثقيلة مرزنة عارف اش كتخرجي من فمك و أش كديري بيديك متحكمة فأفعالك وتصرفاتك . بنت تقيلة هي لي شخصيتها متوازنة مشي برهوشة كتنقز ليه فوق راسو . وحتى من ضحك ديالك تكون بقاعيدة راه كلشي عارف بلي رزانة و تباتة مرتابط  بزوجة و بالمرا تاع دار . 
9-راجلك مشي هو صحبتك 
اكبر خطا كيديروه البنات كتبقا تعاود لراجلها على جارتهم وال خبير خاوي وناميمة و لا تعاودليه على شي ولد واش من نيتك هاعار واش معدك عقل راه ديك هضرة لي كتعاوديها لصحبتك متجربيش نهائيا تعاوديها لراجلك راه عقل راجل مشي هو عقلنا تفكيرهم مختلف علينا واخ يبان ليك مهتم بداك شي لي كتعاودي راه غير كيدير ليك خاطرك هدشي لاش ديما هضري معاه فالمهم وداك تخربيق و تبرهيش خليه لصحبتك.
10-ماطرياليس (مادية)
عدو الرجال كيكرهوها كره شديد لايوصف اصلا عالم عربي كلو واخد نضرة خايبة على مرأة المغربية كيقولو راه كتموت على فلوس و الطونبيلات لأسف شديد عديد من بنات المغربيات خسرو نظرة المرأة المغربية الحرة .هدشي لاش كتلقاي راجل المغربي مقروص من جيهة الفلوس ....وياكي في بداية العلاقة طلبي منو فلوس و لا تعبئة ويلي ويلي راه بحال ضربتي كلشي فالزيرو راه يمكن يسيفط ليك ديك 10 دراهم تعبئة و لكن تأكدي بلي مغديش يفكر فيك فالحلال .
حيت غير كتبدا لمرا كطلب من راجل طلبات مادية صافي كيقول هدي ماطرياليز ادن هي غدي تاخد و انا ناخد غدي يتعامل معاك بهد الاساس  "هاك و را ".

11- الاحساس هو كلشي 
نتي غتلعبي على هد الوثر لي هو الاحساس و مشاعر بيني ليه بلي نتي مشي مادية مكتهمكش فلوس و مضاهر لي كيهمك "هو" كشخص هدشي بغيتك تقنعيه بيه واخ تكوني نتي عكس ولكن ضروري متبينيش ليه داك جانب مادي ديالك.

12- عداكي طيحي فالفخ
دراري والله عايقين بالتحراميات و ولاو بزاف الكروبات كيشجعو الرجال على تجربة البنات غنقوليك بعض تجارب لي كديرو دراري وخاصة لكنتي زوينة 


يجربك واش ماطرياليس ؟؟
غدي يعرفك بشي صاحبو يكون لباس عليه و حسن منو وغيشوف ردت فعلك وكيفاش غدي تصرفي مع هد صاحبو هنا بطبيعة الحال خصكي تكوني دكية و تستغلي هدشي حاولي تجلسي حداه تقربي منو تكبري بيه قدام صاحبو. خلي راجل يحس راسو مهم و بلي كتبغيه و هدشي خصو يبان فالتصرفاتك معاه قدام الناس.
يجربك واش غتوقفي معاه ؟

يقدر يصوني ليك فليل و يقوليك راني محتاج روشارج راني واحل 

خلاصة
نتمنى نقدر نكون وصلت ليك فكرة و واحد حاجة راجل لشتيه باغي معقول معاك كوني حتى نتي معقولة متبقايش تبرهشي وبدلي نمرة و ركزي عليه غير هو. 

4/02/2020

نصائح من القلب الى القلب 💖 بلا كدوب و لازواق

✍🏻كاتبة من ألمانيا اسم لا يهم. 
ليوم بغيت نصحكم البنات من تجارب في الحياة او لي عطاتني دروس لي فادوني في حياتي بزاف.

نصائح من تجارب فتاة مغربية من قلب الى قلب

1- معمركي تيقي في راجل وخا يقوليك كنموت عليك هضرا كتبقا غير هضرا , معمرك ترخصي راسك معاه ديما ديري قيمة راسك , باش حتا هوا يبقا ضارب ليك لحساب متكونيش مدلولة.

2- فاش تزوجي متزربيش في لولاد , حتا تعيشي مع راجلك لحياة او حتا يقوليك هوا بغيت لولاد مقالهاش ليك متولديش بلا ديك زلق ليا إلى حظيتي مغاديش طيحي فهاد غلط ولاد مسؤلية ماشي غير اجي و ولد.

3- معمركي تهملي راجلك ديما عطيه الوقت او تهلاي فيه او تقادي ليه , و كوني نقية و مثيرة او تحلوني عليه ولي بغيتها طلبيها منو متسمحيش ليه فحقك.

4- حنا بنات كنطيحو فهاد مواقف بزاف , او انا طحت فيهم كتكوني محتاجة او يقدر يجي فطريقك شي راجل , لي باغي يشريك مقابل فلوس أو مقابل شي خدمة , ولكن معمرك تبيعي راسك لشي واحد يكون كيفما كان او مهما كانت ظروفك ديري قيمة راسك , ولو تكوني محتاجة مترخصيش راسك عري على كتافك او متعريش على فخاظك, رجل غير يدي منك لي بغا و يلوحك كيف كلبة ميعقلش عليك ,وكاين واحد مثل كيقول عزيها تعزك , و لا تحطي فهد موقف ديما ديري فراسك بلي الله عز و جل كيختبرك و خصكي تكوني قوية, و انشاء الله ربي غدي يفتح ليك بيبان الرزق مكنتيش كتوقعيهم ,حيت نتي ختاريتي حلال و ربي عمرو يخيبك.

5- فاش تبغي تزوجي فكري في المستقبلك او مستقبل ولادك او تزوجي واحد عندو لعاقة يعيشك ملكة , بلا ديك نتزوج حب حياتي او مكيمهش فلوس , لا أحبيبة فلوس كا يهمو او بزاف منكدبوش على ريوسنا , راه المزلوط غادي يعيشك غير فالقهرة والذل ,فكري لولادك لي غدي يكبرو و غدي يبغيو يعيشو حياة احسن , ونزيدك واحد معلومة راجل مزلوط نهار يدير فلوس يبدلك من ساعتو ميعقلش عليك نهائيا, راه مشي بحالك غدي يحن, رجال مشي كي عيالات انانيين كلهم وهدشي مثبت علميا مشي غير هضرة وكلام .

6- معمرك تسمحي فشي حاجة ديالك ولا تخلي شي واحد يديها ليك ديما ديري لي فجهدك باش توصلي ليها.

7- كوني قوية او فكري في مصالحتك قبل مصالحة أخرين ,حيت بنادم ديري لي درتي معاه فالاخير ,على ابسط حاجة ميعقلش عليك.

8- ديري شي حاجة تستافدي منها فحياتك, متبقايش غير كالسة او تابعة لخوا خاوي , تعلمي شي صنعة او شي حاجة لي تفيدك.

9- ديما اهتمي بمظهرك و اناقتك و كوني نقية و تهلاي فراسك مظهر و نظافة من أساسيات حياة.

10-معمرك تسمحي في حقك وإلى شي واحد غلط معاك فشي حاجة خايبة او اذاك نتاقمي منو او ردي ليه صرف.

11- بنات نصيحة الى ايه وحدة كتبغي شي واحد أو مصاحبة, حيدي من بالك ديك فكرة ديال إلى درت معاه لي بغا , راه غادي يبقا معايا حيت كيبغيني , نقوليك واحد حاجة و ديرها حلقة فودنيك الرجال كيف كلاب أغلبية فيهم باغين غير لحم , عمرك تكوني ساهلة او تعطيه لي طلب منك, حيت غير ياكول ليك حلوة يلوحك, او يقلب على غيرك,ومن لخر لى بغاك غادي يجي لداركم, ديري راسك قيمة باش تهوا يديرها ليك ,حيت كيف منتي كتعاملي راسك غدي يعاملوك الناس .

12- متكونش ضعيفة وتبقاي غير تبكي او تشكي لاي واحد أو وحدة جات فطريقك بكي او شكي لي خلقك حيت "الشكوى لغير الله مذلة".

متنساوش تشاركو هد الموضوع مع الناس لي عزاز عليكم و شي دعوة الخير لكاتبة الموضوع 🤲💖

1/28/2020

أجي تفهمي فلوس تاع المغاربة (درهم و ريال و فرنك و سنتيم و دورو )

أجي تفهمي فلوس تاع المغاربة (درهم و ريال و فرنك و سنتيم و دورو )

المغرب عملتها الرسمية و لي متداول بيها (مثلا الأبناك ...)  هي الدرهم المغربي  (رمزها الدولي  هو MAD (بالفرنسية: Dirham Marocain )) و لكن في بعض المدن و الجهات كتلقا الناس كيتعاملو بريال و فرانك و شي مرات حتى فأخبار كتسمعي بسنتيم .
وشحال من وحدة فينا مكتعرفش تفرق بيناتهم و كيصدقو مقولبيناها هدشي لاش بيما انك مغربية و عايشة فالمغرب خصكي ضروري تعرفي فرق بين العملات المغربية و متخليهاش نقطة ضعفك راه كيف مكيقول حمادي "كلشي تضحك معايا فيها الا فلوس ؤهووو".
واحد ملاحظة صغيرة  كلمة المال فالمغرب عندها بزاف ألقاب منها 
- الفلوس ، لعاقة ، صرف ، الدراهم , الحبة ، ريالات , البقشيش ، البينكة، الكرمومة، التيبس، المولى ، عُمَر ، البينقا ، خنز الدنيا ...

لنبدأ على بركة الله موضوع 

أولا قبل كل شي خصكي تفهي أنواع قطع نقدية لي فالمغرب وخاصة لمكنتيش بنت بلاد أما لكنتي مغربية غير فوتي هد فقرة هه
القطع النقدية في العملة المغربية
1- أصغر قطعة نقدية في المغرب 
لي هو الريال المغربي . راه هي ديك قطعة معدنية صفراء وصغيرة ( راه مكتوب عليها خمس سنتيمات) ولي كتساوي 1/20 من الدرهم المغربي   أو 0.05 MAD.
هي هدي لي فالصورة 
5 سنتيم = 5 فرانك = 1 الريال = 1 الدورو = 1 البسيطة
5 سنتيم = 5 فرانك = 1 الريال = 1 الدورو = 1 البسيطة


معروفة في  أغلب المناطق المغربية بالريال ولكن في مناطق شرقية كتسمى الدورو .

ولكن كاين شي مناطق بحال تطوان و نواحي كيقولو ليها "البْسَّيطَة" بحكم ان "البسيطة" هي عملة استعملها المغرب قديم .




2 - 10 سنتيم مغربي
قطعة معدنية صفراء (مكتوب عليها  عشرة سنتيمات ) وجهدك تشري بيها حلوة تاع بونبو ههه. 
هي هدي لي فالصورة 

زوج ديال الريال = جوج دورو =عشرة سنتيم
2 الريال = 2 دورو =10 سنتيم

معروفة في  أغلب المناطق ب جوج دريال أو 2 ريال و  في منطقة  شرقية بجوج دورو أو 2  دورو و كتساوي 1/10 من الدرهم المغربي أو 0.10 MAD .

3- 20 سنتيم 

وهي قطعة معدنية صفراء مكتوب عليها" عشرون سنتيما" .
هي هدي لي فالصورة 

20 سنتيم = 4 ريالات = 4 دورو
20 سنتيم = 4 ريالات = 4 دورو

معروفة في  أغلب المناطق ب ربعة دريال أو 4 ريال.و في منطاطق الشرقية بربعة دورو أو 4  دورو .و كتساوي 1/5 من الدرهم المغربي أو 0.2 MAD .

4 - 50 سنتيم 

وهي قطعة معدنية فضية مكتوب عليها (خمسون سنتيما) 


هي هدي لي فالصورة 
10 ريال = نصف درهم = 50 سنيتم = 10 دورو
10 ريال = نصف درهم = 50 سنيتم = 10 دورو


معروفة في  أغلب المناطق ب عشرا دريال أو 10 ريال أو نصف درهم. و في المناطق الشرقية =بعشرا  دورو أو 10  دورو .
وبنسبة في شمال المغرب كمناطق تطوان ، طنجة ،أصيلة،…  ب  ريال أو 1  ريال .
و كتساوي 1/2 من الدرهم المغربي أو 0.5 MAD أو نصف درهم مغربي.

5- الدرهم المغربي

راه أشهر القطعة النقدية في المغرب وراه قطعة معدنية رمادية اللون مكتوب عليها  " 1 درهم " 
1 درهم = 20 ريال = 100 سنتيم
1 درهم = 20 ريال = 100 سنتيم

معروفة في  أغلب المناطق ب عشرين ريال أو 20 ريال أو درهم.
و في المناطق الشرقية في المغرب بعشرين دورو أو 20  دورو .
و في شمال المغرب ب20 دريال .

6- 2 دراهم 

هي قطعة معدنية رمادية مكتوب عليها 2 دراهم كتعني 2 دراهم ههه وهي من اكثر قطع لي كيكرهوها مغارب ههه حيت كدخو ليهم مع درهم حيت عندهم نفس شكل و حجم  .

2 دراهم = 40 ريال = 40 دورو= 200 سنتيم
2 دراهم = 40 ريال = 40 دورو= 200 سنتيم
معروفة في  أغلب المناطق ب ربعين ريال أو جوج درهم أو زوج دراهم وفي المناطق الشرقية بربعين دورو . و في شمال المغرب ب40 ريال.

7- 5دراهم 

وهي قطعة معدنية فضية من وصط و دائرة بحلقة دهبية مكتوب عليها "5 دراهم"
5 دراهم مغربية
5 دراهم = 100 ريال = 500 فرنك

 معروفة في  أغلب المناطق ب مية ريال أو خمسة  دراهم.و في منطقة وجدة و مناطق شرقية بميا دورو أو 100 دورو .

8- 10 دراهم
هي قطعة معدنية بحال 5 دراهم و لكن هي كبيرة في حجم مكتوب عليها 10 دراهم معروف ب200 ريال .
كيف ما فصورة 
ألف فرانك مغربي , ميتين فرنك مغربي
10 دراهم = 200 ريال = 1000 فرانك
اغلب مناطق تاع شمال كيقولو ليها 1000 فرانك وفيفي مناطق شرقية معروف ب 200 دورو.
هدو هما جميع قطع نقدية الموجود في مغرب و لي كنتعاملو بيها دب ندوزو لوراقي المالية المغربية .
20 درهم / 50 درهم /100 درهم /200 درهم
20 درهم / 50 درهم /100 درهم /200 درهم
1- 20 درهم 
 لونها بنفسجية معروف في أغلب مناطف ب400 ريال و في مناطق شرقية ب400 دورو و فشمال  2000 فرنك .

2- 25 درهم 
لونها غادي ليموني و قليل فين تلقايها مهيم معروف فالمغرب 500 ريال و مناطق شمال 2500 فرنك و فشرق مغرب ب500 دورو. 
وهي هدي لي فصورة 
25 درهم = 500 ريال = 2500 فرنك
25 درهم = 500 ريال = 2500 فرنك



2- 50 درهم

لونها خضر معروف في أغلب مناطف بألف ريال و في مناطق شرقية ب1000 دورو و فشمال  50 ألف فرنك .
3- 100 درهم 
 لونها بني معروف في أغلب مناطف بألفين ريال و كثير لي كيقول عليها "قرفية"
و في مناطق شرقية ب2000 دورو و فشمال  100 ألف فرنك .
4- 200 درهم 
ورقة لي عزيز على مغاربة هه لونها  أزرق و كيقولو عليها زرقة و معروف فأغلب مناطق 4000 ألف و فشمال ب 200 ألف فرنك و في مناطق شرقية ب 4000 دورو .

1-علاقة بين الدرهم المغربي و الريال المغربي ؟

كنضن كلنا كنفهمو الدرهم المغربي (الي مكنتيش كتفهمي درهم غتلقاي شرح فوق لجميع العملات المغربية).
 المهيم الريال هو أقل عملة مغربية وتسمى بعملة الشعب وراه هي العملة لي كان كيتعاملو بيها جدودنا قبل الدرهم (ريال يعود للقرن الثامن عشر، العملة التي كان يستخدمها المغاربة قديم) بطبيعة الحال عملة ريال نادرة و مبقاتش و معدكي متشري بيها ههه.

طريقة تحويل الدرهم المغربي الى الريال المغربي ؟
1 درهم = 1 درهم * 20 = 20 ريال
يعني تضرب الدرهم المغربي في 20 يطلع لك كم بالريال المغربي .
نعطيك أمثلة
نصف درهم = 10 ريال المغربي
5 درهم = 100 ريال المغربي.
10 درهم = 200 ريال المغربي.
15 درهم = 300 ريال  مغربي.
20 درهم = 400 ريال مغربي.
50 درهم = 1000 ريال المغربي.
500 درهم = 10000 (عشرا الألف) ريال المغربي.
1000 درهم = 20000 (عشرون الأف ) ريال المغربي.
2500 درهم = 50000 (خمسين ألف) ريال المغربي.
5000 درهم = 100000 (ميات ألف "نصف مليون") ريال المغريبي.
10000 درهم (عشرة آلاف درهم) = 200000 (ميتين ألف "مليون") ريال المغربي.
1000000  (1 مليون) درهم = 20000000 (20 مليون) ريال المغربي.
مثال تطبيقي
- مشيتي عند لحانوت تقول ليه بشحال بكية لفورماج؟؟ لي فيها 7 حبات ؟؟ يقول ليك 140 ريال يعني كيقصد 7 دراهم.
 راه غير بالممارسة غتولي قضية تجيك ساهلة و بزاف.

2-علاقة بين الدرهم المغربي و الفرنك المغربي ؟
فرنك مغربي كيتاعملو بيه خصوص الناس تاع نواحي الشمال( الفنيدق و المضيق وطنجة وتطوان وأصيلا سبته وماجاورهما).
وغير للمعلومة الفرنك هو عملة كانت كتعامل بيها المغرب خلال حماية الفرنسية وكتسمى الفرنك الفرنسي و فداك وقت الاقتصاد كان هابط فناض سيدهم وزير المالية المغربي "عبد الرحيم بوعبيد " وقاليهم 1 درهم غنقسموه ل 100 فرنك ههه.

طريقة تحويل الدرهم المغربي الى الفرنك المغربي ؟
قضية ساهلة راه 1 درهم هي 100 فرنك.
يعني تضرب الدرهم المغربي في 100 يطلع لك كم بالفرنك المغربي .
نعطيك أمثلة
نصف درهم =  500 فرنك.
1 درهم = 100 فرنك.
10 درهم = 10*100= 1000 فرنك . 
20 درهم = 20*100= 2000 فرنك.
50 درهم = 5000 فرنك.
1000 درهم = 100000 فرنك.
10000 درهم (عشرة آلاف درهم) = 1000000 الفرنك المغربي 
(1 مليون ديال الفرانك). 
1000000 (1 مليون) درهم = 100000000 (100 مليون) الفرانك المغربي .
3-تحويل الدرهم المغربي الى السنتيم المغربي ؟
أسهل عملة وهي سنتيم حيت بكل بساطة راه الفرنك هو سنتيم هههه .
راه غير اسم مختلف وصافي ناس تاع شمال كيقولو الفرنك و ناس تاع داخيل كيقولو السنتيم و راه كتستعمل كلمة سنتيم بزاف فأخبار و الاشهارت في المغرب 
مثال تطبيقي
راه تقدري تسمع في شي الاشهار هد شقة كتسوى 20 مليون فاعلم أن المقصود هو "السنتيم" يعني أن هده الشقة تساوي 200 ألف درهم .
دب بكل بساطة
- 1 الدرهم = 100 سنتيم = 100 فرانك
مثال
مليون سانتيم أو مليون ديال الفرانك معناها عشرة آلاف درهم.

3-علاقة بين الدرهم المغربي و الدورو المغربي؟
أول هدي عملة جزائرية كانت مستعمل قبل الدينار الجزائري.
 ولكن لمشيتي لمدن الشرقي المغربي (مثلا فالناظور و رياف والجهة الشرقية...) غتلقايهم كيتعاملو بيها بحكم انهم قراب لجزائر.
وراه الدورو المغربي فيه نوعين
* الدورو الوجدي
* الدورو الناظوري /الحسيمة
1-الدورو في الناظور (شمال المملكة ونواحي) كيساوي نصف درهم اي خمسين سنتيما يعني عشرة ريال مغربي يعني 0.5 = 1 دورو.
2-الدورو في وجدة هو خمس سنتيمات مغربية 0.05 MAD لي هو الريال يعني 1 درهم = 20 دورو = 20 ريال.

ملاحضة كاين لفظ اخر ولي هو الميا او مية دورو، يستعمل في الناظور و والحسيمة وهو مائة دورو ( خمسين درهم مغربي او الف ريال مغربي ).

أكثر أسئلة منتشرة حول المال المغربي؟

1 - ما هو مليون سنتيم مغربي ؟؟
كاين شي بائعين مكيخافوش الله و يقدرو ينصبو عليك هدشي لاش ديما أكدي ليهم على عملة يعني واش مليون درهم و لا مليون سنتيم يحدد ليك .
مليون سنتيم/فرنك (1000000) هو عشرة الآف درهم مغربي ( 10 ألف درهم ) لي كيساوي 200000 (مئتان ألف) ريال /دورو .
مليون سنتيم = مليون فرنك = ميتين ألف ريال = مئتان ألف دورو =عشرة ألف درهم


خلاصة 
راه مع وقت غدي تولي طيري فالحساب خصكي تهدئي و متزربيش. و نصيحة راه أشهر العملات لي كيخدمو بيها في المغرب هي الدرهم و الريال وراه كلشي كيفهم ليها هدشي لاش .
ديما شخص لي قدامك طلبي منو يحدد ليك نوع عملة لي كيدوي بيها واش الريال و لا الدرهم . ومتنسايش راه فرنك هو سنتيم و ريال هو دورو.

متنسايش خلي لينا تعليق شجعينا و عاودي لينا على شي طرائف وقعو ليك مع الفلوس .