-->

2/06/2019

كيفاش تصرفي الا بوركابي هددك بصورك 😱



كيفاش تصرفي الا بوركابي هددك بتصاورك
✍كاتبة هدى نوراة 
موضوع اليوم هو كيفاش تصرفي الى بوركابي أو أي شخص هددك بتصاورك , راه كاع الدراري كيزمل عليهم الضمير و كيبداو علينا صيفطي تصويرتك صيفطي صدرك صيفطي نشوف زين.
 المهم اي حاجة تقدر تسخنو راكي فهمتيني ،
 ونقوليك نصيحة غير كوني خوافة حيت لي خاف نجا،  راه باش كتسيفطي ليه تصاورك تيبدا يمارس بيهم العادة السرية .
أقسم بالله عظيم راه بلاما تخدعي بكلامو وبلي هو باغي غير يشوفك حيت توحشك ولا زيد من أسباب لي تيبدعو فيها الدراري تباركلاه عليهم، 
ومسكينة كاين لي على نيتها كتصور و كتبين وجهها باش تأكد ليه أن دوك المؤهلات راه ديالها، مغنقولش مكلخة انما تاقة فيه بزاف و دايرة النية فالزواج بيه, اودي راهم شلاهبية والله ما فيهم ثقة واخا تكوني معاه 10 سنين حيت رغبة الجنسية لي كتكون عند دراري قليل فيهم لي تيقدر يتحكم فيها هدشي لاش كيبغي يفرغها فتصاورك....
وراه شحال من البنات و القليلة فيكم لي مامدوزاش معاه غتكون مدوزة معاه عامين و كيبدى يهددها و يخلعها بتصاورها، فاش كيكونو كيطلبو التصاور كيكونو كي الكلاب و كيتملحسو، نهار يبغي ينتاقم منك كيصدمك كتقولي ما يمكنش هاد الحيوان هو داك الملاك لي كنت تايقة فيه.
 سمحولي طولت في المقدمة لميهم غنهضر ليكم يوم على كيفاش تصرفي الى هددك شي شخص أو صديق او بروكابي بصورك شخصية وهددك بنشرهم .
ونعطيك جميع الحلول الممكنة لي تقدر تعاونك و ربنا معك احبيبتي.  

************


1/ لاتخافي تمالكي نفسك
أول حاجة متخافيش غير بشوي عليك تنفسي بهدوء و خلي عقلك يخدم و يفكر باش متسرعيش أنا حاسة بيك,وياكي ديري أي قرارات فردية و يسخن عليك راسك راني عارفاك خايفة ولكن متخليهش يربحك و يحطك تحت رجلو ويدير بيك مبغا . 


2/أبدا لاتضهري خوفك له.

 بغيت نقوليك لي ما عندو سيدو عندو لالاه، بغا يخلعك خلعيه نتي و خليه يبول فسروالو بالخلعة خليني من تصاورك فالمجمر و داكشي، أول حاجة ديريها خاصك تعاملي معاه على أساس ما خايفاش و تخرجي فعينك، و ما خاصكش تكوني خايفة أصلا راه الكلب لي كينبح مكيعضش، بيني بلي ما عندكش علاش تخافي و ما كتسوقي لحد و لي بغا يشوف التصاور يشوفهم باش هاكا يفهم بلي عندك زايد ناقص و ما غيصور والو واخا ينشرهم فالجورنال .


3/الشرطة

راه تهديد بالصور جريمة يعاقب عليها القانون المغربي غتسوليني واش المغرب يعاقب على جريمة تهديد وابتزاز بصورة ؟غنجاوبك بأه ألالة راه حسب القانون مغربي الفصل 538 من القانون الجنائي والنص هو كما يلي:  
من حصل على مبلغ من المال، أو الأوراق المالية أو على توقيع أو على تسليم ورقة مما أشير إليه في الفصل السابق، وكان ذلك بواسطة التهديد بإفشاء أو نسبة أمور شائنة، سواء كان التهديد شفويا أو كتابيا، يعاقب بالحبس من سنة إلى خمس سنوات وغرامة من من مائتين درهم (20 دولارًا) إلى ألف درهم (100 دولار)".

فقط خصكي دليل اذن غدي تسكريني التهديد و حاولي تخليه يهدر اوديو ولاسجلي هضرو الاكان تهديد مباشرة ولاسجلي محادتة ديالو "دخلي غير شي تطبيق من جوجل بلاي ديال تسجيل مكالمات" و هزي لا كارط ناسيونال ديالك و تمشي لأقرب كوميسارية، غادة ديكلاري، الديكلاراسيون كتكون سرية بزاف كتقولي للبوليس بلي ما بغيتيش داركم يسيقو الخبار، راه كيخدمو بسرية تامة و مكيحاسبوك مكيعايروك واخا نتي مصيفطة صدرك و مؤخرتك ، كتعطيهم سميتو كاملة و العنوان ديالو و كتخرجي السوق، كيبعتو عليه حتى لدارهم , ماكيفهم حتى حاجة و كيبقايترعد من الخلعة ..ديك الساعة كيولي هو الجاني و نتي المجني عليها و خليه يتخلع شوية و ديك الساعة لي بان ليك تنازلي ولا لا...هاكدا العملية ساهلة لهاد الدرجة. 


4/موقع الكتروني

الامقدرتيش تمشي عند بوليس كاين حل أخر وهو واحد موقع سميتو "الابتزاز القانوني antiextortion" هد الموقع مختص غير فهد جرائم الاكتروني بحال تهديد و ابتزاز وصور غدي يعطيك الحلول عملية وراهم عاونو بزاف تاع الناس نصحك تمشي تشوفيه وراه من أكبر مواقع في عالم عربي و فيه ناس مختصين فمجال وفيهم حتى أطباء نفسيين باش يساعدوك نفسي لتخطي هد مرحلة و حتى كيفاش تنساي هدشي لي داز عليك  . هما عدهم رقم خاص بيهم من أجل تبليغ عن حالات الابتزاز .
لبغيتي تواصلي معاهم فواتساب هاهي نمرتهم :
966 55 684 9012+ 

5/خلي فيسبوك يتكلف

هدي في حالة مكان تيهددك فالفيسبوك و كنتي سيفطي ليه تصاورك من الفيسبوك .أول حاجة غدي ديري هي محي تصاورك من عندو فالفيسبوك و نتمناو ميكونش هزها فتلفونو .
غتسوليني كيفاش نمحي تصاوري من عندو فالفيسبوك(نفس لامر فالواتساب سيري محي تصاورك) هد الخاصية كاين فالمسنجر وطريقة هي :
*انقر وحدد الصورة التي ترغب بحذفها.
*اضغط “حذف”.
*انقر على خيار “الحذف عند الجميع”.
*قم بتأكيد خيار حذف الرسالة.

*سيظهر لك إشعار مكان موضوع الرسالة “بأنك قمت بحذف رسالة”.

تانيا غدي تبلغي بيه فالفيسوك باش يسدوه ليه حساب الفيسبوك. 
ماعليك غير تعمري المعلومات في هدا الرابط و هدا الرابط ...وبعد 24 ساعة الفايسبوك سيحضر كل حساباته..
- شخص ما صايب كونط باسمك أو بإسم شخص من الأسرة وحاط حتى صورك وتيشوهك أو صور قريب العائلة..وتوصل حتى يدير ليك بلوك باش مايطلعش عندك..
غتدخل للهدا الرابط  وغتختار ma confidentialité وبعدها غتحطي رابط الصورة ديالك لي حاط الفوكونط في أول خانة..وإسمك الأول والثاني في ثاني وثالث خانة..وبعد المراجعة وفي حالة كان داك الشي صحيح الفايسبوك غيسد الحساب في ظرف 24 ساعة...

6/رفع دعوة الى الله 

الاملقيتي حتى حل وتسدو بيبان فوجهك فنصحك بهد الحل لغنضمن ليك 100% بلي مشكلة تهديد بالصور غيتحل, 
استغفري ربك وصلاة و ارفعي أمرك لربك واش مشي هو الملك بيدو كلشي . بقاي غير تصلي على نبي محمد صلي الله عليه وسلم ومتفكري فوالو  "فقط كوني واتق بلي الله عز وجل غيحل ليك هد المشكيلة مشي سوقك كيفاش مهيم غتحل وصافي" نتي فهد المرحلة تتطلبي المساعدة من رسول الله باش يكون شفيعك  قدام الله ويحل ليك هد المشكلة وراه اتحداكي الى تبعتي هدا طريقة راه غتحل ليك موشكيلة وما غدي تعرفيها منين تحلات حيت الله قادر على كل شيء... أقسم بالله لا تستهيني بصلاة على النبي فهي تصنع المعجزات. 

نصيحة من قلب 
 من اللخر جمعي رأسك وايلا زملتي و بغيتي تصيفطي لحمك درقي وجهك يا بنت راه و الله ما فيهم الثقة دابا داك بوركابي يتسيف عليك وا بقاي تقولي لا حبي ما يديرهاش .... المهم هاد الموضوع مالحتوش حيت بغيت نطيح منكم ولا نعايركم البنات انما راه هدفي هو تستافدو وتوعاو .
وراه كول وحدة فينا عندها شي صاحبتها عندها نفس المشكل ❤❤❤ 

متنسايش تخلي ليا تعليق او ملاحضة أسفل هد الموضوع وشاركي هد الموضوع مع الناس لي عزاز عليك باش حتا هما يستافدو. ↓↓↓↓





↓↓↓↓ شارك هذا الموضوع عبر مواقع التواصل الأجتماعي ↓↓↓↓