اكيد قريتو مواضيع ومواضيع على الثقة في النفس.وشفتو وسمعتو ناس متخصصين وصفحات وكتب ولكن وخا هاكاك كتلقاي راسك باقيه ماتيقاش في راسك.ومزال ما تغير فيك والو واخا جربتي داكشي لي قريتي وسمعتي .والو ماكاينه حتى نتيجة و فبعض مرات تتكون نتائج ولكن دغيا تزول
المهم انا غادي نحاول نهضر ليكم على موضوع التقة بالنفس بطريقه جديده ومختلفه شويه ممكن تقنعك هاد المره او تاثر عليك او تغير تفكيرك .
تخيلي واحد الفلوس تسرقات ولي سرقها هي صديقتك ولكن نتوما بجوج متهمين ونتوما بجوج مطلوبين للتحقيق عند بوليس وبطبيعة الحال كل وحدة غادي تدافع على نفسها.
1/أول بنسبة لصديقتك شفارة : أول ماغادي يسولوها بوليسي وبما انها هي مولات الفعلة اكيد غدي ترتابك وعينيها يبقاو يدورو فراسها ويديها كيلعبو وركبتها كتحرك وكتمثل الهدوء وتتصنع عدم الخوف وعدم التوتر وبمجرد أنا المحقق يحمر فيها او يشككها في نظراتو وصرامتو غتخاف و غتوتر وتهرب بعينيها من نظراتو وتتلف وصوتها يزيد يتناقص ومبرراتها تزيد وهضرتها طول وحلوفها يكثر ولونها يتبدل تبدا تصفار وتخضار واغلاطها وعثرات لسانها تكثر و كلما تجي تحلها من جهه وتلقى راسها كفستها من جهه اخرى.
كلما واجهوها بالحقيقه هي تواجهم بناس اخرين وقوة الناس اخرين وكلام وشهادات ناس اخرين غير نفسها وقوتها وحقيقتها.حيت ماعندهاش القدرة باش تواجه الناس ونفسها,فتبدا تقوليهم(سولو فلان عليا راه يعرفني وعارف اش كنسوا) (قولو لفلان يجي ويقوليكم بلي هادشي كاع ماكاينش حيت ديما يقولي نت مامنكش جوج)(فلان شافني هاد الصباح في البلاصه لفلانيه جيبوه ويقوليكم بلي ماكنتش تما وقت الحادث) (اكيد راكم غير غالطين فيا راه فلانه صاحبتي هي لي سرقت وانا ظالميني وهي لي قاتلي واحد نهار سرقت لماما فلوس يعني ممكن ديرها) هادشي كامل غدي يوقعليها حيت ماصادقاش وكلامها مامصدقهاش وعقلها مامصدقينش لسانها يعني كلشي شاهد عليها حتى حواسها وجسدها وتصرفاتها بلي شفاره وكتكذب,تهضر بلا تقة في النفس حيت ماعندهاش منين تجيبها وهي كتقول عكس لي كاين لداخل ديالها بسهولة كتنهار وتشتت وأي واحد باغي يعري شنو مخبية تهيج وتمرض وتوتر وتتعب اكثر وتقرب من الانهيار وتبدا تلوم وتعاتب في راسها حتى ترجع بالوقت تكره راسها وحاقده على نفسها وحتى على الدنيا.
هادي هي الشخصية لي ماتايقاش في راسها.
2/-أما نتي
فاش غيسولوك غتكوني جالسة مكالمية وهادية عينيك جادين ماخايفينش مايضوروش كل ماشاف فيك المحقق وطول الشوفة كل ما انت اصريتي بشوفتك وطالبتيه بشوفتك انه يتوقف وينزل عينيه,
كتافك مقادين وجسمك مسترخي اعصابك مسترخية وحتى حاجه فيك ماكتهز لا شعرك ولا يديك ولا ركبتك ولا دقات قلبك ماخايفاش من لي غدي يوقع حيت المهم عندك هو انك مادرتي والو والمهم عند هيا تبان حقيقتك,كل ما سولك وخوفك كتزيدي تصدميه بصلابتك وايمانك بنفسك هضرتك قليلة ومختصرة (انا ما شفتش ماسرقتش ما عندي مانعاود) .
كلما صعد باتهاماتو كيزيد يضحكك ويزيد يخليك تشفقي عليه وتزيدي تسايري داكشي لي كيدير وتخليه يحمق راسو ونتي كتفرجي عليه و ترفضي تجاوبيه ونت ماهمكش اتهاماتو .
وكل ما بغاك تعتارفي ويخليك تقتانعي ان كاع الادله ضددك وانك نت مولات الفعله نت كتزيد تشكيه في هضرتو هو وصدقو هو لانك كتسوليه (واش متأكد من هادشي)(واش كاع هادشي انا دايراه ومخبياه ومافخباريش).
وتزيدي تصديه وترفضي انك تهضري بزاف وتكثري هضره معاه وثكتري المبرارات وماتقلبيش ان الناس تشهدلك او تشهد معاك.او تثبت انك صادقه حيت كتشوفي بلي نت مامحتاجاش لناس او شهادة الناس حيت متاكده من انك ماسرقتي والو واي موقف بحال هذا غير كيزيد يهين كرامتك وعزة نفسك وخا يبغي يخوفك بالمصير ديالك والعذاب لي يستناك والظلام ديال سيلول كتزيدي تشجعي وتبثي على هضرتك وماخايفاش حيت فاهمه ان هذا ظلم وغدي يزول مع الوقت وبقدره الله وبحقيقة نفسك الصادقة وكلامك لي ماغاديش يتغير مع المواقف.
هاذي هي الشخصية التايقة في راسها.
الخلاصة
ديال هاذ المثالين ان التقة بالنفس كتجي من الصدق لي في لداخل ديالك كتجي من نفسك لي مصدقاك ومتصالحه معاك ومن تقبلك لنفسك وتاكدك من نفسك وانك عارفه شنو كديري وشنو مبادئك وشنو صفاتك وشنو كتسواي عند راسك.
كلما كان فيك الخير ولداخل ديالك نقي وبعيدة على الخدع والغدر والشر و واضحه مع روحك وماتغلطيش في حق نفسك وفي حق الله وقريبة من لله اكثر و كتستمدي القوة ديالك منو كيفوح منك الصدق ويبان في تصرفاتك وفي عينيك وفي وجهك وحركاتك وكلامك وفي هيبتك وثباتك ورزانك ويقينك في نفسك مايتهزش ومشاعرك مكالميه وتوازنك عالي حيت كلما تقتي في الله انه معاك وموجود وبلي نت ماشي كيف يتصوروك وماشي الشخص لي باغين وماشي الشخص اللي كيهضرو عليه ومتاهمينو وباغيين يهينوه ويشكوه في راسو مغاديش تضعفي او تيأسي وربي غيجازيك ويعطيك الثقة بنفسك وتقدري تواجهي بكل سهولة حيت معندك مناش تخافي او شنو تخبي.
لذلك لي بغات التقة بالنفس وماعرفتش شنو دير او منين تبدا غدي نقولك خلي كلشي وبداي بعلاقتك مع برب العالمين وبنفسكِ صلحيها وحسنيها وطوريها وتخلصي من الافعال او المعاصي لي كديري ولي كتزيد تضعفك وتزيد تقسمك وتفرغك وتستنزف هيبتك وقوتك حيت ربي هو القوة وهو الطبيب النفسي وطبيب الصدور والقلوب والروح حيت مايمكنش تكوني تايقة في راسك ونت كتكذبي ومايكمنش تكوني تايقة في راسك ونت كتنافقي ومايمكنش تكوني تايقه في نفسك ونت ماتديري والو لا عمل و لا عباده حاربي شعور الغيره لي هالكك حاربي شعور السيطره لي واكلك حاربي شعور القنط لي مأيسك....
مايمكنش تكوني مرزنة ومتبثة ونت مفتونه ومشاعرك مسيطر عليها الشهوه غير تشوفي وحدة اجمل منك تنهاري وتكرهي راسك او راجلك خانك تيأسي وتكرهي المستقبل.
الى حياتك مافيهاش الله وكتمشاي ضدو وضد انسانيتك ومتخلية على قوة كبيرة ومصدر الطاقة والاستمرار والتغير والامل والثقة لي هو الله المغير والقوي المتين فغادي تكوني عامرة يأس وقنط وضعف وهم وحزن وعدم رضى وعدم توازن الى كنتي ديري حوايج ماراضياش عليهم عرفي ان حتى قلبك وعقلك وجوارحك كاملة ماراضياش وماباغيكش ديريهم وكتعاقبك وتمارس عليك ضغضها داكشي على ديما كتحسي بالهم وبعدم الراحة والخوف وعدم الثقة بالنفس.
عوض تدربي كفاش تهضري مع الناس بتقة وتدربي كفاش تلبسي باش تاخدي التقة ..تدربي اول حاجة كفاش تكونية قوية بالله وبنفسك انطلقي من هاد النقطة اولا جربي وفشلي وعاود جربي وحاولي بلا ملل وبكل نيتك ومتاكده غادي تقلبي حياتك كاملة وغدي توصلي للتقة بالنفس وخا مايكون عندك لا جمال ولا مال.
نقطة اخيرة ومهمة بزاف بغيتكم تنتابهو ليها هو الغرب كيقراو ودايرين جهدهم باش يوصلو العلم وافكار وتداريب وتمارين ديال التقة في النفس باش يحسو بالراحة ويعرفو يعيشو حياتهم باش يستمرو حيت نجيك صراحة هدف ككل انشان في هد حياة هي سعادة وسعادة هي تصالح مع الذات, ويخفو داك الالم لي يحسو به حيت ماعارفينش الله وغير مسلمين وقوتهم كيجيبوها بتمارين وافكار وعلم عوض الله ولكن حنا عندنا دين وقران ورب العالمين يعني هو قوتنا والى زدنا العلم وهاد الافكار مع قوة الايمان بالله وكلام رب العالمين غادي نعيشو في سلام مع نفسنا ونوصلو لديك سعادة و تصالح مع الدات لي هي أساس الثقة في النفس
تقة تجي من الخير لي فيك
متنسايش تشاركي هد الموضوع مع الناس لي عزاز عليك باش حتا هما يستافدو. ↓↓↓↓