أي جوج مزوجين راهم كيدابزو هدشي عادي تيوقع في أحسن عائلات اما تيكون سبب تافه ولا بسبب مزاجية لي هي مشكل كبير كيوقع فيه مزوجين حنا كبشر كتحكمنا المزاجية يمكن يوم راجلك فصبح يبغيك و فليل يتقلب عليك و يكره يهضر معاك هكدا نحن البشر يعني خصنا ندخلو هد فكرة في عقولنا ان مزاجية امر طبيعي فكل انسان راه الكانة حال وحوال . وكما قالو ناس زمان صداع لي كينوض بين زواجين تيخلي لعلاقة زوجية عندها نكهة خاصة ولكن عندكم حق دابزو وتناقشو الا أنهم كاين شي حجات ممنوعين الا وقعتو فيهم أثناء خصامكم فراه تدمير هد علاقة غيكون قريب لامحال.
في هد الموضوع غذي نقوليكم عشر محرمات في علاقتك الزوجية تجنبوها باش دابزو حيت هد محرمات ستولد الكره و انتقام في قلوب أحبة و مغديش تخلي علاقة زوجية تكمل . وخلي هد تسع محرمات خط احمر عندك هدشي لابغيتي تكملي مع راجلك وخلي و حتى راجلك يقرى هد الموضوع :
1 :تجنبو كلمة الطلاق
خصوص الزوج تجنب كلمة الطلاق و خوي عقلك منها حيت راجل لي يقوليك والله حتى نطلقك وتيهددك بطلاق فهدا مبغيش الصلح نفس امر بنسبة لزوجة لي كتهدد زوجها بطلاق ...حاولو تخرجو من عقلكم هد فكرة الطلاق حيت يمكن في حالة غضب زوجة طلب طلاق وزوج يكون غاضب بزاف لدرجة انه غيقول ليها انتي طالق ويكون باغي طلاق فديك اللحضة و لكن من بعد غدي يندم بزاف ولكن ندم مغديش ينفعو حيت سيحدت الطلاق كلنا عارفين الطلاق الصريح لايشترط فيه النية يعني واخ رجل يقصد ديك كلمة ولا ميقصدهاش فراه محسوب طلقة .
احفضوها عن ضهر قلب فكرة الطلاق حيدوها من عقولكم وقلوبكم فخطرا. خليو كلمة الطلاق كلمة مكايناش فقاموسكم الزوجي.
2 :اياك وضرب جسدي
ضرب يعني حاجة وحدة هي راك مبغيش تسمع ولاباغي تحاور ولاباغي تهضر اصلا. بغي غير تهين وتريد أن تؤدي جسد . وانسان بطبعو منتقم واخ يسامح كيبقا قلبو حاقد و فيه شعلة الانتقام تجاه طرف الاخر لي ضربو . يمكن لضرب ان يغير قلب زوجة عاشقة .خصكي تعرفي هو أن زوجك عندو حق يضربك حيت ربي عطاه رخصة نصحك تقراي هد موضوع باش تفهمي مزيان قضية الضرب و تعرفي حقك :
حتى زوجة لي كضرب زوجها راه مباغاش الصلح وراه كتمارس عليه مهان و هو لكان تيضربها فتيمارس عليها الديكتاتورية وهد زوجين باغين الشر لبعضياتهم مشي صلح.حيت لكان زوج تيبغي زوجته فمستحيل يؤديها جسديا حيت جسد زوجة يعتبر أمانة عند الزوج أمام الله عز وجل.
و هدا مشي هو اساس العلاقة الزوجية سعيدة زواج تيكون مبني على الحب ورحمة و تفاهم مشي على الضرب.
3 :تجنبو الدعاء
لي تيبغي راه متيدعيش عليك بالشر .هدشي خصكم تولفوه الدعاء ممنوع باش تدابزو .
كاين رجال غير تيخرجو وتيبقا يدعي فزوجته كيقول الله يلقيها ليها ياربي تشعل عافية فدار وتموت وزوجة غير كيخرج راجلها كتبقا تدعي فيه تقول الله يعطيه موصيبة و لا ضربو طونوبيلا . طام الكبرى هي تخافو تدعيو فلحضة لي كتكون ساعة استجابة .نعاود ليكم قصة جارتنا لي دعات فزوجها فلحضة غضب كانو مدابزين بسبب تافه وهضرة كتجر هضرة حتى دعات فيه قالت ليه الله يعطيك لعمى دازت مدة تصالحو ومشات توجد لغدا و
راجلها مشى لخدمتو وهو تيخدم فمواد البناء و بغلط طاح ليه على وجهو مادة حارقة خرجات ليه على عينيه ووجهو وتصاب بعمى. وبسباب هد دعاء لي فلحضة غضب تشتات أسرة ديالهم.وياكم تستهينو بادعاء راه ساعة استجابة تقدر تكون فأي وقت.لبغيتي تدعي دعي بخير قولي الله يهديه ولفي فمك دعاوي زوينين باش حتى لدابزتو تدعي دعوة زوينة تقدر تكون مستجابة . هدشي نفسو كينطبق على الزوج تجنب تدعي فزوجتك. دعي دعوة زوينة.تقدر تكون هد دعوة سبب وتخلي هد هد مدابزة لبيناتكم تسالي.
4:لاتفتحو الماضي
وياكم تفتحو ماضي راه اوراق ماضي اكبر سبب تيخلي موشكيل يكبر لدرجة انكم مغديش توليو تعرفو شنو هو سبب رئيسي تاع موشكيل مثلا زوج تيجي معطل كتقوليه مراتو مالك تعطلتي يقوليها غير خدمة وتبدا تشك وتجبد ليه ماضي و تفكرو فواحد عام جامعطل لدار حيت مشا خانها مع شي وحدة وكتوليو فمشكلة كبر و كتجبدو ماضي وتصدقو واقعين فمشاكيل وحداخرين ...حاولو تنسو ماضي و دائما سامحو وبداو صفحة جديدة و نهائيا حاولو متجبدوش ماضي را لي فات مات .
5:مدخلوش ولادكم في مشاكيلكم
واخ نتوم مدابزين على شي مشكل بيناتكم هدي عادية .ولكن ولادكم لاش كدخلوهم كنلقاو فشي اسر مغربية مرأة مدابز مع راجلها وكتمشي لكوزينة وكتبقى تبكي ومدور بيها بناتها و هما غير تيشوفو فيها و حزنين و تيقولو حشوما ابابا تدير لماما هكا واخ هما اصلا سبب مسكل رئيسي فبنات تيحقدو على باباهم و يقدرو يحقدو على ازواجهم . ونفس لأمر لزوج كيخرج معصب من دار وتياخد ولدو معاه وتيبقا يشكي عليه ماماك ممزياناش ماماك صعيبة وكدا ودري تيبقى يتجاوب مع اب ديالو وتيقول ليه اه ابابا عيالات ناقصين عقل خصهم لعصى و كيطلع دري حاقد على عيالات . دب موشكيلة كبيرة هما ان اباء معرفينش نتائج ديال هدشي راه بحال والو نهار تالي ولدين كيتصالحو و يجلسو يضحكو و تينساو مشكلة كيتجاوزوه حيت كبار و لكن معارفينش تأثير سلبي و كبير لي خلاوه فعقول ولادهم الصغار .نصيحة ديما تبغي دابز مع مراتك دخلها لبيتكم وسد عليكم بساروت وحاول تلقا معاها حل. راه زوج تيلعب دور كبير فلأسرة تجنب نهائيا دابزو قدام ولادكم راه محيط ديالو لي هو نتوم هدا المحيط العائلي هو لي كيبني شخصيتو .وأثناء الحمل زوجتك تجنب نهائيا دابز معاها حيت هدشي تيأثر على طفل وعلى شخصيتو وهدشي متبتت علميا وخصوص في الطب النفس.
6:لاتوسعو الخلاف ولاتشكي همك الى أهلك
باش يحصل الخلاف بيناتكم مدخلوش عائلة نهائي .حيت اسيدي نت باش كتدابز مع مراتك كتمشي عند ماماك وكتقوليها ها مراتي هشنو دارت وزيد زيد كتخوي عليها هي الأم كتهز فقلبها من جيهت مراتك و كتحقد في قلبها راه نت غدي تدخل معا مراتك لبيتكم و غتنسى كلشي وتصالحو ولكن أمك مغديش تنسى راه تكونو كضحكو وهي كتشوف فيها نضرة حقد وكره وهدشي كلشي بسببك انت .نت ومراتك فنهاية غتصالحو وتراضو و لكن أمهات متينساوش هدشي نفسو بنسب لخوت وخصوص دري لي عندو خوتاتو تيبقاو حاقدين على مرات خوهم و كيتسناو غير فرصة .لو كنت صادق في حبك و وفي لهد الحب مشاكلكم زوجية خليها بيناتكم ابدا مدخلش اهلك و هد امر كينطابق على زوجة .
تيهلكوني شي زوجات تيمشيو عند امهاتهم و تيقول ليها راجلي قال فيه كدا وكدا ولا زوج كيقول لأمو راه مراتي قالت عليك بلي نتي لفعة اش هد نيفو اش راك كتسنى من ماماك دير هدي نميمة حرام تصرف دون مستوى .
واحد حاجة أخرى الأم خاصة كتكون كتحبك وكلنا عارفين بلي لانسان لي تيحبك الى عاودتي ليه همك راه تيهزو فقلو و تيولي همو نت. نت باش غتعاود لماماك راه غدي ترتاح ولكن امك غدي تعدبها تحملها ماطاقة لها .هدشي لاش تعلم تقول حمد الله باش تسولك ماماك على علاقتكم قوليها حمد الله بخير واخ تكونو مدابزبن حيت ماماك مغديش تعاونك فشي حاجة فقط غتزيد تكبر ليكم موشكيل لأنها هي بطبيعة الحال غدي تجي مع ولدها راه كبدة ومدير. وهدشي مشي غير الأهل راه حتى أصحاب متعاودش ليهم.لسولك صاحبك قوليه حمد الله بخير عايشين مزيان متخليش عيون الناس عليكم.
من لخر مشاكيلكم خليوها بيناتكم .
 |
| كن رجل قبل أن تكون زوج |
7:العين وسحر
علاش هد فكرة مزال مبغيناش نحيدوها من عقولنا باش كدابزي مع راجلك كتربطي هدشي بسحر و عين و كتقولي راجلي مخاصم معايا حيت عينوه و لا راه تيسمع لماماه حيت ساحر ليه حنا في مجتمعنا عربي بصفة عامة لانؤمن بحب ديما رابطين سعادة بسحر مثلا فتاة جميلة و مخلقة و تزوجات واحد خايب تيقولو راه سحر ليها ولا كتكون بنت تزوجات بواحد مرفح بزاف وهي فقيرة كيقولو سحرات ليه .
هنا تنوقعو فمشكيلا كبيرا باش الازواج تيربطو مشاكيلهم بسحر تيوليو مشاكيل غير كيتزادو بحال تيخدمو قانون الجدب راه سحر وعين كاين ومكتوب فقرأن كريم وعلاجو ساهل وهو رقية الشريعة مشاكيلنا خصها حلول منطقية خصها حوار عيب فينا مشي فالسحر ولا عين .
نحن مجتمع متنأمنوش بالحب مهووسين بالعين الحاسدة.
8:المعيار وتخصار لهضرة وتعياب
اول حاجة واش ففخباركم السب يعني معيار من الكبائر الذنوب. كلام لي تحت سمطة دليل واضح على انكم ممربينش.مدابزين راه الحل بهدوء و بنقاش و حوار منطقي اما معيار راه غير تيجرح وتيخلي أثر كبير في القلب .و تجنبو لعن و مقارنة ازواجكم بشي وحداخرين و لا تبقاي تقولي نهار كحل لي عرفتك فيه.
وتجنبو تعياب بوجه تبقاو تعيبو بعضياتكم و لا ديرو شي تصرفات بيدكم تثير غضب بحا تبزقي لزوجك ولا زوجتك .
9:للنساء ! متخرجيش من دارك
لدابزتي مع راجلك متمشيش غضبان لداركم غتقولي ليا علاش ؟ راه مشي انا لي قلت هدشي راه الله عز وجل نهاكي عن خروج من منزلك حيت الله عز وقال
في سورة الطلاق: {يَا أَيُّهَا النَّبِيُّ إِذَا طَلَّقْتُمُ النِّسَاءَ فَطَلِّقُوهُنَّ لِعِدَّتِهِنَّ وَأَحْصُوا الْعِدَّةَ وَاتَّقُوا اللَّهَ رَبَّكُمْ لا تُخْرِجُوهُنَّ مِن بُيُوتِهِنَّ وَلا يَخْرُجْنَ إِلا أَن يَأْتِينَ بِفَاحِشَةٍ}
راه راجلك لقاليك خرجي من دارك رفضي و قولي ليه هد أية ربي منعك تخرجي خوف عليك من فاحشة .راه كيف مامكتوب فأية واخ راجلك يطلقك متخرجيش من دارك حتى تفوت لعدة هدشي قالو ربي .
وبلاما نهضرو على عيالات لي تيخرجو من بيوتهم بدون ادن من ازواجهم اش كتخربقي راكي غالط زوج تعتبرين أمانة عندو وراه فدين اسلامي حرام تخرجي من الدارك بدون ادن منو
حتى لكان عزو و لا زيارة اهلها او عيادة مريض ضروري من ادن زوجك راه عليك سمع وطاعة زوج الا في حرام بطبيعة الحال .
راه سبحان الله باش نتي كتخرجي من دار راه عاد كتزادي تكبري مشكل و تخلي شيطان يدخل بيتاكم.
نهاية
والله ثم والله الى تجنبتو هد 9 محرمات أثناء خصام راه أكبر مشكلة بيناتكم راه غدي تحل بسهولة.
متنسايش تشاركي هد الموضوع مع الناس لي عزاز عليك باش حتا هما يستافدو. ↓↓↓↓