الواليدة شوفي وقراي مزيان يا نبع الحنان ヅ❤
✿ أول ما غادي نتولد ممكن نبقى أسبوعين أو تلاته هادئ و ناعس...فالمطلوب من سيادتكم تفيقيني بأي طريقة و ترضعيني لأن معدل السكر عندي في الدم ممكن ينزل وهادشي خطر على حياتي في هده المرحلة الله ينجينا وينجيك.
✿ بعد الأسابيع الأولى غادي تلقايني كنغوت بزاف و كنبكي و غادي نجمع عليك خلق الله سمحي ليا واستحمليني شوية لأنني في هاد الفترة أنا باقي جديد وغير متعود على الضوء و الأصوات و درجات الحراره المتغيرة و اللمس و الحوايج... هادشي كامل جديد عليا وغادي ناخد وقت حتا نتعود يمكن في 3 أو 4 شهور و على قبل هاكا غادي تلاقيني نضيف و راضع و سانك سانك ولكن أعتذر منقدرش نحبس من الغوات و ما عليك غير الصبر يا الميمة .
دبا أجي نتعمقو شوية ونوريك شي حوايج تقدري تكوني ماعرفاهمش.
✿ في حالة ما إدا كنتي ناوية ترضعيني رضاعة طبيعية خاصك ديري حسابك بأن الرضاعة حسب الطلب ماشي شرط كل ساعتين و من فضلك تهتمي بالنظافة الشخصية ديالي الله يخليك حيت مكنحملش ريحة العرق و ريحة الأكل اللي لاصق ليا في حوايجي و كدلك كنكره الريحة خصوصا ديك القاصحة فالله يرضي عليك إلا بغيتي تتريحي للواليد غير نعسيني بعيد عليك لحقاش حاسة الشم عندي قوية جداً و هاد الحوايج كيخليوني مقَرف طول الرضاعة فياريت تراعي ليا هادشي الله ينورك الحبيبة .
✿ أه وخاصك تحبسي من شريب القهوة مادام نويتي ترضعيني طبيعي لحقاش داكشي غادي ينزل ليا مع الحليب فاش نكون شاد زيزة ويعصبني ... و تبعدي عن التوابل الحارة و أي حاجة معروف أنها كدير غازات بحال القزبر و المعدنوس و البروكلي لأن هادشي كامل غادي يرجع عليك على راسك في الٱخير فشوية ديال المعقول والصبر الله يكرمك.
✿ ندوزو دابا لكانت عندك النية وباغا ترضعيني بحليب الغبرة أه داك الصناعي ديال الفرماسيان خاصك تنظمي رضعاتي كل ساعتين تلاته على الأقل في 3 شهور اللولة ومن بعدها حتى نطلب و فاش تبغي تصاوبي ليا الرضاعة ديريها بماء مغلي وتقدميها ليا دافية واخا أنا كنبغيها باردة ولكن ماشي مشكل نصبر حتى أنا شوية أصلاً مزيانة لصحتي واللي شاط من الرضاعة يتلاح في البلاصة ماشي تخزنيه وفاش نطلب تعطيه ليا راه كيثلوت ببقايا لعابي.
✿ يالسكعة وردي البال لا تولي منوضة الواليد في نصاصات الليل تجريو بيا في السبيطارات اللي أصلا ماعندكمش.
✿ و ما تنسايش من بعد كل رضعة أو رضعة تجيبي شي قطن مبلول بماء دافي و تمسحي تحت كدومتي وعنقي من الفوق و تحت باطي و تنشفي هاد البلايص بقطن ناشف باش ما تتفاجئيش بإلتهابات و تسلخات منظرها خايب خصوصًا إلا كنت مطبز شوية.
✿ ونزيدك الميمة فاش تبغي تصبني ليا حوايجي الله يخليك ما تستعمليش مواد ريحتها قاصحة لحقاش كيف ما قلتلك حاسة الشم عندي قوية و الروائح القوية سواء زوينة ولا خايبة كتأثر على جيوبي الأنفية و كتخليني غير قادر على شم ريحتك اللي متعود عليها و كتحسسني بالأمان.
✿ أه كنت غادي ننسا واحد الحاجة مهمة. من فضلك ما تخليش ليكوش عامرين مدة طويلة على جلدي على ود التسلخات و غسلي ليا بماء دافي مزيان و إلا جات على خاطرك بلاش أي نوع من أنواع الغبرة ديال طالك لحقاش ذراتها كتدخل في نيفي و ممكن تسبب لي حساسية في الصدر على المدى الطويل ..
✿ شوفي مع مول الدار يجبد اللعاقة وشري ليا كريمات الأطفال .. و إلا كنتي غادي ديري ليا زيت جونسون ديريه على جلدي و هو مبلول مشي على الجلد الناشف لأنه غادي ينشفو أكتر .
يالاه نتمنى تكوني فهمتي .
تهلاي ليا في راسك ❤♫