شاي آتاي المغربي وماادراك ماأتاي مغربي لكانت الصين هي اول دولة كتاشفاتو فالمغرب هي اول دولة لي تفانت فيه وعطاتو حقو وتعتبر اكبر مستورد لشاي في العالم ,مستحيل دخل شي دار مغربية وميحطوش ليك اتاي مغربي وفمناسبات كبار اتاي مغربي حاجة مهمة جدا وكيف تيقولو ناس زمان اتاي كيحلي المجمع .
الأنثى المغربية لطالما كانت تتفنن فيه و كتقنو بطريقة كتسحر بيه اي واحد وخصوص عائلة راجلها قديم في بعض مناطق في مغرب كانو باش كيمشيو يخطبو شي بنت كانو كيطلبو منها طيب اتاي حيت بنت لي تعرف طيب اتاي على حقو وطريقو كتكون مرزنة وهادئ .
بنت لي متعرفش طيب أثاي على اصولو بلاما تقول على راسها مغربية.
فهد الموضوع غنقوليك طريقة اصلية وبتفاصيل باش طيبي اثاي مغربي على اصولو وتخلي اي واحد يحماق على أثاي ديالك هدف من هد موضوع هو تراث ديالنا منساوهش وحمد الله ناس الجنوب مزال محافضين على طبلة أثاي و أثاي ديالهم ياسلام .
مواصفات أثاي مغربي:
-لون احمر عسلي.
-مداق مابين حلوة وحار .
-ساخن.
-كشكوة ولا كيف تنسموها رزة أثاي.
-منكه (نعناع خصوص).
مكونات أساسية لأتاي مغربي
-سكر و من احسن لكان سكر تاع القالب.
-نعناع ريحة مجهدة و خضر منعن و مغسول مزيان ويمكن تستغناي على اتاي وديري الشيبة ولكن اتاي مغربي معروف بنعناع .
باش كنسمو اتاي مغربي؟
كاين بزاف طرق باش تنسمي اتاي ولكن لي متداول حسب عادتنا هو النعنان كاين لي تيديرو صيك بحال ناس جنوب لي تيقوييو اتاي وتيديرو علك وسكر واتاي شعرا هدو كيجيهم اتاي قاسح تيساعدهم فهضم مهيم ندوز للمنسمات تاع اتاي .
-الشيبة تقدم في فصل البرد.
-زعتر باش تهضم ماكلة بدغيا.
-ازهار البرتقال لي كيسميوه بمغربية الزهر كيديروه مع نعناع كيخلي ريحة زوينة فاتاي و مداق زوين كيديروه فربيع.
-نجمة يانسون لي كيسميوها الباديانا كينسمو بيها اتاي كيطلع معتبر وحلو.
-زعفارن الحر نسمة رائعة ورائحة لاتقاوم و تيكون صحي.
-البابونج.
-الفليو هدي كتصلاح فالبرد واعرة بزاف للرواح .
-اكليل الجبل.
*****************
-علك الطلح الصحراوي وسميتو ايضا الصمغ العربي راه كيتباع عند العطار والاملقيتيش وصي شي واحد من صحراء يجيبو ليك راه موجود بكثرة فمناطق الجنوبية ملاحضة راه لبان الذكر مشي هو العلك .
فرق بين طلح مزور وطلح حقيقي ؟
حقيقي كيكون ساهل يتهرس ليك فيديك يعني بدغيا كيتفرتت ولحطتيه تحت سنانك كيتعلكو مفيهش مداق ومفيهش لون و مزور راه عكس هد اشياء.
-ماء ومن احسن يكون ماء حلو ولا ماء تاع البير ,راه كاين بعض مناطق فالمغرب بحال منطقة الداخيل ماهم باسل كاعم كيجي اتايهم بنين هدو من احسن يديرو ماء معدني ولا ماء تاع بير.
-شاي أخضر (هنا غنوقعو فواحد اختيار مبين جوج انواع تاع اتاي كاين اتاي مكركب يعني حبوب كيكون رخيص وكاين اتاي شعرة غالي ).
فهد الموضوع غنقوليك فرق بيناتهم .
مكونات طبلة اتاي
-كيسان صغار وخفاف و مزخفرين ديال زجاج مثل اشهر انواع كيسان في المغرب كاين كأس «حياتي»،
وهي كأس صغير من الزجاج الشفاف، للاستعمال اليومي، اما كأس «البلار» فهي كأس ملونة غالية الثمن.
- “البراد” أو إبريق الشاي صغير راه من اخطاء لي تيديرو لبنات هما تيشحرو اتاي فكاسرونة فمها كبيرة وكيبقا بخار يطلع سما , اختي اتاي خصو يتغم وعرق ديالو يرجع ليه مشي ديريه فكاسرونة هدا راه مشي اتاي هداك راه ماء وزغاريت.
-الصينية (وترافق الصينية والبراد،ادوات اخرى يطلق عليها «الربايع» وهي ثلاث علب من نفس المعدن، تكون مخصصة للشاي والسكر والنعناع).
-علبة صغيرة كيتحط فيها سكر (كاين لي تيبغي اثاي حلو بزاف وكيزيدو بوحدو ).
فرق بين اتاي شعرة اتاي حبوب(مكركب)
-اتاي شعرة كيكون مداقو خفيف و صحي كثر وخصك ديري كمية كبيرة من اثاي عاد تحصلي على داك مداق اتاي قاصح ومدن جنوب كيستعملوه بزاف .
-اتاي شعرة كيطيب بالماء البارد والمكركب يشلل بالماء ساخن عاد يطيب واتاي شعرا غالي في الثمن .
-اتاي حبوب تضاف اليه مواد ملونة لكي ياخد الون المطلوب لشاي وهدا هو سبب الدي يجعله داكن وشبه متسخ في تشلالو وهو خفيف في دوق اماالشعرة فهي اجود لانها لاتضاف لها اي مواد ماونة لكن ربما مواد حافظ وهي اغلا ثمن من لحبوب.
- اتاي شعرا احسن اكيد هو ليكيستعملوه ناس الجنوب كتدوق مداق تيكون خفيف و حتى لون كيكون خفيف مائل للصفرة.
- اتاي شعرا تيكون خفيف اتاي حبوب تيكون ثقيل.
طريقة صحيحة وصحي باش طيبي أتاي مغربي
كيفاش ندير أثاي مغربي
أول ديري ماء فمقراج يسخن حتى يطلق سبولة ديالو .
تانيا نقي نعناع وغسليه مرة وجوج وخليه فماء ومن بعد نشفيه و لبغيتي اتاي يجيك زوين متخليش ماء فنعناع يعني سقطريه فشي شبكة باش داك ماء لي فيه يتسقطر.
طريقة غسل النعناع
هادي طريقة بسيطة ولكن فعالة :
منين تبغي تعمري اتاي خدي نعناع او ديره فشي كسرونة اوكوبي عليه الماء او خليه غير شي 2 دقايق او حيديه او غادة تشوفي اش من تراب طلق فلماء أفضل مديريه تحت روبيني او تشلليه.
تالت باش تشوفي ماء بدا يطلق سبولة يعني بدا يخرج منو الدخان شلي أتاي.راه كيف مكان نوع أتاي خص ضروري تغسليه جوج تشليلات حتى لثلاتة , بزاف الناس تيخليو تشليلة لول , هدي غير عادة المغربية خاطئ راه أتاي مغربي ملئ بمبيدات الحشرات خصو يتغسل مزيان وبالماء الساخن جدا.
كيفاش تشلي أثاي ؟
لكان براد صغير غديري جوج معالق صغار تاع أثاي فبراد وغدي تكبي عليه ماء ساخن جدا و تحركي براد مزيان ومنبعد تلاوحي ديك التشليلة .
رابع نعمرو براد بماء ساخن ولكن نخليو واحد جوج صباع يعني منعمروهش تال فم ونسدو برادة بغطايتو.
خامس كنحطو براد على نار مهيل بزاف وعلى راس صغير تاع بوطة باش ميتحرقش ليك براد من الجناب ولكان مجمر تاع فاخر يكون حسن وبزاف حيت اتي خصو يتشحر على خاطرو وكيطلع بنين .
سادس باش اتاي يغلي و طلع كشكوشتو طفي عليه .
سابع وحطيه فالصينية وزيدي عليه النعناع لي كيكون ناشف من الماء ومهرساه بيديك باش تخرج البنة من النعناع مزيان وحشي اتاي مزيان بمعلقة داخ البراد و متخليهش على برا باش نعناع ميتحرقش ومكيتأكسدش ويعطي مداق خايب فأثاي .
ثامن زيدي سكر على حساب دوق ولكن سكر قالب كيكون حسن.
وراه اتاي مغربي مخصوش يكون حلو بزاف باش تحسي بمداق اثاي ونعناع ملاحضة كاين بنات تيديرو اتاي كيتشحر مع السكر وهدا تصرف خطير .
تاسع نحطو براد يرتاح فشي بلاصة باش يدير رزة ديالو ويطلق مداق نعناع فيه فديك وقيت حطي صينية وكيسان لي خص ضروري يكونو مغسولين مزيان و منشفين باش طلع فيهم كشكوشة.
عاشر كبي ورجعي , كبي اثاي فكاس وفالكب هزي يدك لفوق باش طلع رزة و رجعي اثاي لبراد عاودي هد طريق 5 مرات وكثر هد طريقة كتساعد باش رزة طلع بلاما ديري علك .
-احدى عشر كشكوشة اثاي مهمة بزاف وخصوص في مدن الجنوب المغربية وكيستعملو العلك باش يطلعو رزة اثاي , علك شديه وطحنيه راه ساهل يطحن وزيدي نص معلقة صغيرة فالبراد مع السكر والنعناع وغدي تلاحضي كشكوشة كبيرة و ومكتحيدش .
تقديم اتاي مغربي
أثاي ضروري يتقدم سخون و كشكوشة واضح ويكون لون أثاي احمر عسلي.
صينية لي كطحت لضياف كتكون زايد بواحد طبيسل تاع حلوة و من اشهر الحلويات التقليدية المغربية لي تيرافقو صينية اتاي مثل «كعب غزال» و«البريوات» و«الغريبة».
فتقديم اتاي خصو صينية تكون نقية و يكون على اقل خمس كيسان فصينة مغسولين ومنشفين عداكي تجيبهم كيتسقطرو بالماء وعاد راه من قلة ادب تحطي جوج ولا واحد واخ يكون غير ضيف واحد ,
ديما ديري احطياتك تاع سكر متقويش حلاوة فاتاي .
ملاحضة
-يجب العلم ان دراسة فرنسية توصلت الي ان المغرب اول بلد مستورد للشاي من الصين ولكن للأسف كل أنواع الشاي المستوردة تحتوي على أكثر من 30 نوع من المبيدات الحشرية بنسبة عالية لاتسمح بها أي دولة بالعالم. كلام منقول عن الأخ عبد اللطيف صاحب برنامج دار الخبر.
من لخر اثاي مغربي مشبع بالمواد السامة لأن الصين لا تعترف بالمعايير الدولية المنظمة لإستعمال المبيدات وخاصة مع مغرب لي كيعتبر اكبر مستورد للشاي من الصين . ولقاو فاتاي 30 نوع تاع مبيدات تاع حشرات وللعلم فقط بزاف انواع تاع اثاي مغربية و نعناع ممنوع يدخل لمريكان والاوروبا حيت مكيحتارموش معايير دولية للصحة وراه تسول اي واحد ساكن فخاريج باش كيبغي يدي معاه نعناع فمطار كيمنعوه كيقولو ليه نعناع ميدخلش هد معلومة معروفة.
ولكن مؤخر خرجات وزارة الصحة لونسا تقرير كينفي هدشي وقالت ان اتاي لي جاي من جنوب هو لي خطير اما اتاي لي جاي من صين فراه كيحتارم معايير دولية للصحة.
شاركونا بطريقتكم في اعداد اتاي مغربي ☻☻ في تعليقات اسفل هدا موضوع