-->

8/23/2019

تعلمي الشطارة في الشراء(بالداريجة المغربية).

فن المساومة و كيفية المساومة و  المساومه وكيف تربح في المساومة الشطارة المغربية

لطالما المغربيات تشهرو بقدرتهم على المساومة يعني شطارة فالبيع , ولكن مع الوقت ولاو بنات مغربيات غير قادرين يساومو وهد قدرة بدات بانقراض هدشي لاش فهد الموضوع غدي نعاودو احياء هد الموهبة.
ومعروف في المغرب بنت لي تعرف تشطر كتكون قافزة ودكية وحقها متزكلوش .
عمرك تمشي عند بياع وشراي  وتبزي عليه يبيع ليك شي حاجة صحا وبلا خاطرو ولاطيحي منها, حيت قال الله تعالى يَا أَيُّهَا الَّذِينَ آمَنُوا لا تَأْكُلُوا أَمْوَالَكُمْ بَيْنَكُمْ بِالْبَاطِلِ إِلا أَنْ تَكُونَ تِجَارَةً عَنْ تَرَاضٍ مِنْكُمْ ) سورة البقرة آية 188.
وقال رسول الله صلى الله عليه وسلم («إنما البيع عن تراضٍ»).
يعني من لخر مدليش راسك ومطلبيهش مبغاش يبيع ليك من حقو تاحج ماهي بزز مبغيتيش تشري بداك تمن من حقك توحد ميبزز عليك تشري من عندو بداك ثمن حيت لفلوس ديالك تشري بثمن لي بغيتي وحوايج دياولو يبعيه بثمن لي بغا.

فلول غنقولي معلومات خصكي ضروري تعرفيهم من بعد عاد ندوزو لهضرة الشطارة.

 1- تعلمي ديما باش تدخلي لشي محال وكانت عاجباك شي حاجة عندو متمشيش ليها نيشان متبينش ليه راه مهبلاك حيت غيزدحك فالثمن ومغديش يبغي ينقص ليك.

2-حاجة لي غدي دير هي باش تدخلي هزي شي منتوج أخر وتساومي معاه فثمن وهزي حاجة أخرا وساومي معاه وعاد رجعي لمنتوج لباغا مهيم فلخر غنعطيك مثال باش تفمهي كثر.

3-ديما حاولي دي معاك شي حد , غدي تهبطي ليه ثمن مثل هو قاليك ب100 درهم غتقولي ليه لا غير ب60 درهم هو غيقوليك 90 درهم غتبقاي معاه هكا هكا غتقولي لي 70 درهم ومغديش يبغي بقاي معاه ينقص ليك مغديش يبغي هنا غيجي دور صحبتك لي غتنقز وتقوليه يالا خليها غير ب80 درهم هنا مليون فمئة غدي ينقص حيت حنى البشر بطبعنا نحب أمور الوسطية.

4-ديما هبطي ليه ثمن خصكي تعرفي بلي ثمن لي تيبيع بيه راه مشي هو الثمن حقيقي تاع منتوج ديما تيزيدو ديك 30 حتى ل60 درهم فوق تمن منتوج أصلي.

5-وياكي ثم وياكي تساومي بياع قدام الناس هدا راه كيطيح منو ومكيرضاش قدام الناس هدشي لاش متيبغيش ينقص تيبغي يبين لناس ان اثمن عندو مكينقصهاش باش ميضسروش عليه, مهيم ديما تفاداي تساوميه قدام الناس بزاف.

6-ديما شكريه وشكري سلعتو وكبري بيه مطيحيش منو وخصوص قدام الناس ولكن نقص معاك جيبي صحبتك لعندو وشكريه قدامها هدا تيخليه ديما يدير معاك مزيان.

7-اي بائع تيكون متوقع تساوميه على منتوج هدشي لاش تيزيدو الثمن فوق الثمن اصلي للمنتوج يعني الربح ديالهم ,حاجة وحيدة لنصحك بيه مطلبيهش ينقص ليك حتى النص هدي راه اهانة ليه وحشومة كاع.

8-متبينيش ليه نهائيا راه منتوج عاجبك بزاف خلي تعابير وجهك عادي , خليه يحس بحال زايد ناقص عندكي.

9-كوني مستمعة سمعي كثر متهضري باش تغلبيه حاولي متبقايش طيري فالهضرة , بقايا مركز على هضرتو باش تعرفي وقتاش تحبسي مساومة معاه ووقتاش تعرفيه متردد وغيقبل الثمن.

10-لحسيتي بالبائع متردد هنا استغلي هد اللحضة وقولي ليه هدا اخر ثمن نعطيه ليك و لاقولي ليه هدا جهدي ولا قولي هدشي لي عندي وجبدي وريه فلوس.

11-متلحيش عليه بزاف باش هو ميتكبرش عليك خلي عند ثقة

دب ندوزو لطريقة شراء منتوج لي باغا بشطارة المغربية.

1*غدي دخلي لمحل لي نتي باغا تشري منو و تقولي "سلام" ونتي مبتسمة وتكون لابس لباس عادي باش البائع ميتمعش فيك ويزدحك بشي ثمن ,مهيم كوني مبتسم وبشوشة الوجه وصوتك يكون حنين وبلا داك طنيز وطيحي من قيمتو وقيمة منتوج لي تيبيع غير بلسان حلو راكي غدي تاخديه بالثمن لي بغيتي, وديري فبالك هو راه مشي خدام عدك , راه بحالك بحالو عامليه زوين غيعاملك زوين وعابخاطر راه غدي تربحي.

2*نقولو مثل عجبك شي حاجة عندو حمقاتك غدي تخليها هي لخر مهيم غدي تهزي شي حاجة اخرى حتى هي عاجباك وتقيسيها ولا كان تلفون قلبيه مزيان وسوليه على مميزاتو و من بعد سوليه "بشحال هدي" غدي يقول ليك قدا و قاد  غدي تقولي ليه "الله ياودي غليتي عليا بزاف لا ؟
غيقوليك "مغليتش هدا هو الثمن" قولي ليه"واصاوب صاوب نقص هدا راه مشي ثمن ديال بيع راه غليتي عليا".
بقاي معاه نقص مانقص غديري راسك معجبكش الثمن وغدي تحطي ليه منتوج وتقولي "هدي غاليا متفهمناش عليها نت كتغلي".

3*غتمشي تهزي منتوج اخر و تقولي ليه "وهدي بشحال".
غدي يقول ليك قدا وقدا غتقولي ليه "لا لا أودي نت كتغلي راه باليا نت مبغينيش نشري من هد المحال"☺️.
دب نتي مزال موصلتيش لسلعة لي باغا .

4*نتي غدي ديري راسك بحال خارج من المحال وغدي تهزي منتوج لي كنتي باغا وديري راسك ممسوقاش وغتقولي ليه بطريقة فاقدة امل منو هه "وبشحال هدا".
غيقوليك قدا وقدا غتقولي ليه "وصايب معايا فالثمن ولاغتجري عليا"
هنا نسبة كبيرة انه غينقص ليك الثمن .
 وهنا غتجبدي ثمن لي باغا وتكمشيها ليه وتقولي ليه "يالاه صافي 70 درهم ثمن مزيان والله هدا هو جهدي".

ملاحضة
الا مبغاش ينقص ليك صافي مطلبيهش وبقاي محافض على كرامتك وقولي ليه  "صافي أخويا سمحليا الله يجيبليك التيسير" .

بعد الجمل تاع شطارة في الشراء بالداريجة المغربية

*وصاوب صاوب

*راه لنقصتي 20 درهم مدات مجابت راه فلوس تمشي وتجي مهيم هي المعاملة.

*راني جيت نيشان لهد المحل وشحال من حانوت خليت حيت صحبتي وصاتني نجي عدك وقاتليا راك كتعامل مزيان وتتفاهم فالثمن.

*دب هدي بشحال...لاواه سمحلي خداوها ناس تنعرفهم غير ب70 درهم من عندك ميكدبوش عليا.


*هو : كنبعوهم ب 250 غي نتي قلت ليك 200 
نتي : ههه لا غي نقص
هو : نخليها ب 199
نتي : نو خليها ب 150 
هو : لا مايمكنش مامسلكاش 
نتي لا مسلكاك
ولا مبغاش ينقص ليك  قولو صافي أخويا سمحليا الله يجيبليك التيسير وسيري وهو غايقوليك أجي زيديني 10دراهم وديها قولو لا والو أخويا انا قلتليك اللي عندي وغايجمعهاليك فبلاستيكة وبالصحة والراحة ههه


*مثلا قلتي ليه 70 درهم وهو قاليكك 90 بقاي معاه هكا وفلخر قولي ليه 80 درهم أخر تمن لا دب مدويش منزيدكش ريال فوق هدشي.

*ولفنا المحال شوي زعم اول مرة غنجيو ناخد شي حاجة من هنا.

*باركا عليك الا زيد نقص مكاين لابراك لاوالو انا تنازلت وطلعت حتى ل25 حتى نت تنازل.

*غير تصاوب معايا


*غير نقص شوية راه مازال تابعني بزاف الحاجات نشريها


*من لخر اخر تمان ...


* شراتهم بنت خالي غير 150dh , صاوب معايا باش المرة الجاية نولي ليك.


* أويلي بزاف 200 أخويا و صاوب معايا خلليها لي ب 150 درهم إلى گالك لا لا و الله ما فيها گولييه غير صايب معايا يجيب الله تيسير إن شاء الله مزالة راجعاا عندك خاصني شي سبرديلا مزال و نتي غ كذبيها مضوريش عندو مزال ههه.



*دير شي ثمن زوين خلينا نوالفو المحال راه تابعنا شلا حوايج.

*اقول زيدي قوليه ما نزيدك غا صلاة على النبي راه محالنا هادا زعما خلينا باش نكونو كليان راه قلتليك صافي هيهي ايلا مابغاش قوليه صافي مبغيتيش او سيري هههه.

*قولو انا طالبة وباقي تابعني الكرا والمصروف ومالين الدار بعاد هههه

*شي كلمة زوينة ديال البيع باش نعودو نرجعو عندك


*قولو اخاي شحال اخر ثمن........قولي ليه زيد نقص شويش الى قالك مافيهاش سيري بحالك زيدي فتشي فشي محل اخر هو لا بانت لو مسلكة غيعيط لك مسلكاتوشي غيخليك تمشي ونتي عاود الى جبرتي قل منها فجهة اخرى شري مجبرتيش رجعي ديها منو.....وهذي هيا شطارة.

*شحال تخليهلي باخر تمن ادا عودلك نفس تمن قولو ونقص شوية زعما جيت عندك نيشان.

*قولو انا را غا تانقرا ماشي خدامة غير نقص نقص باش ديما نبقا نجي نتقدا من عندك.


* اويلي اخويا هاذي بربعالاف لا لا غليتي علينا و حنا يلى قصدناك و عجبنا المحل و بغينا نجيبو ليك كلاين اخرين و انت تقول لينا 200 درهم و نقص شويا شو نعطيك 170 منزيدكش عليها يلاه صلاة على نبي جمع دوك جوج فردات و خلينا نتوكلو على الله يلاه الله يرضي عليك راه باقي غادي نجيو ناخدو من عندك بجوج و ثلاثة غير تصيب معانا باش نرجعو عندك .

*قولي ليه خود 20 درهم ولا 10 دراهم ديال الربح ديالك وإلى غشيتي بينك وبين اللي خلق هههههه .

*عطيه شي ثمن طايح بزاف باش يقولك اوا نقصتي بزاف و بداي تزيدي شوية بشوية حتى توصلي للثمن لي بغيتي و قولي ليه هذا هو جهدي الا مابغاش قولي ليه الله يعاون وبلاما تبيني ليه بلي محمقاك ديك السبرديلة حيت غايتسيف عليك.

*ههههه احم احم قولي ليه راه حنا كليان زعما ومني تاهذي قولي ليه صايب معايا راه اول مرة نتقدا من عندك باش نولف المحال ونبقا نتقدا ديما.

*قوليه نقص شوية خلينا نولفو المحال.

*دير تمن ديال بيع مزيان راه جيت عندك نيشان دير شي تمان ديال الخوة فاش يعطيك تمن قوليلو لا بزاف نقص نقص وصافي قولي تمن لي بغيتي من بعد قولي ليه صلي علا نبي صافي.

*كولي ليه شت بحالها فحانوت اخر بقل

*Akher taman 3andek. Ghaygolikk.... golihh la ana 
Jit 3andek neta direct hit wahed sahbty kat9da 3andek ogatlii 3andek haja .zwina okatsaweb f taman dakchi 3lach ob9ay meny menek hta takhdiha 9ell

تنويه 
متنسايش باش تفاهمو على تمن شكريه وبتاسمي فوجهو وقولي ليه كلام زوين باش يبقا يتهلا فيك:
*صراحة سلعة عندك شهوة منها غدي نعود ديما نجي نتقدا من عندك وحتى نت مبشور مشي بحال دوك بياع وشرايا لي ديما معبسين.

*الله يجيب تيسير.

*الله يعاون.

كتبو لينا في التعاليق عن كيفاش كتشطرو فالبيع.
↓↓↓↓ شارك هذا الموضوع عبر مواقع التواصل الأجتماعي ↓↓↓↓