-->

8/14/2019

تعلمي الصواب بدارجة المغربية - جزء الأول

الصواب بدارجة المغربية اللهجة المغربية اللهجة العروبية اللهجة المغربية

ديما اهل المغرب كيتميزو بالصواب (باللهجة المغربية) وكلام حلو وفأي مناسبة كتلقاهم مصوابين وكيعرفو يهضرو , ولكن مع وقت وفيسبوك بزاف بنات ولاو زرقين فالصواب متعرف لاتعزي لاتبارك لاترد سلام لاوالو...
مهيم هد الموضوع غنعلمكم كيفاش توليو مصوابات وكلام حلو ميخطاش فمكم وتخلي اي واحد يحماق عليك توليو بحال الفسيات لي معروفين بصوابات وكلام حلو.
1 - فلول نتفاهمو على واحد حاجة من قلة ادب تغوتي على شي حد كبر منك ومكتعرفيهش مزيان بسميتو حرفيا راه من قلة ادب وحتى لكان انسان تعرفيه متغوتيش عليه بسميتو حرفية فقط الاكان شخص قريب منك بزاف مثلا ختك وخوك وصديقتك مقربة.
 اللقاب ضروريين
*لكان راجل قولي ليه عمي. 
*ولاكانت مرا قولي ليها خالتي. 
*راجل كبير كتعرفيه قولي ليه سي الحاج ولاكنتس مكتعرفيهش حيدي ديك سي. 
*ومرا كبيرة قولي ليها الحاجة 
*بنت قدك قولي ختي .
*ولا ولد قدك قولي خويا.
*شي راجل فزنق مكتعرفيهش قولي ليه اشريف.
*وهناك القاب الاحترام بحال امرضي, سي ,لالة ...

2 - سلام من وجه يعتبر من تقاليد مغربية و لي هو عبارة عن جوج بوسات وعلى كل خد بوسة مشي بفم سلمي بخدك ويدك فكتافها بحال غتعنقيها شوفي صورة وغتفهي مزيان ⇩⇩⇩.
تعلمي الصواب بدارجة المغربية - جزء الأول
ملاحضة هنا كندوي على سلام بين عيالات مشي راجل ومرأة هدوك فقط سلام لايتجاوز مصافحة اليد وتكون سريعة.
وقتاش غتسلمي ؟ ناس كيسلمو فلول مور متيقولي تحية سلام وفلخر باش كيقولو وداع .
اولا نبداو بالسلام لتلقيتي بشي واحد كتعرفيه اش غتقولي ليه ؟
-خص يكون وجهك بشوشة واول حاجة خص يشوفيك طرف اخر و ابتسامة فوجهك يعني راكي فرحانه حيت شفتيه وياكي تغوبشي فوجهو هدشي من قلة أدب.
-صوتك يكون مسموع وفرحان ومتزربيش فهضرة راه توحد متابعك.
-متكونيش خايفة دوي ونتي واتقة من هضرتك.
-صوتك يكون أنثوي وهادئ
ملاحضة
صواب تاع ملاقيا شي حد كتعرفيه كيتكون من 6 حوايج اساسيين لي هي تحية و تسول على الصحة وعلى أحوالو وتسول على مالين الدار  وتبليغ السلام و الوداع.
 1- بدأ محادتة
السلام عليكم ,  أهلان ,  مرحبا , صباح خير ,ألو,سلام   +(لقب). 
مثلا أهلان أسي الحاج.

مثلا مرحبا بسي حسن .
 2-تسوليه على صحتو
لباس ,  كيدار  بخير , كيداير صحيحا ,صحيحا مزيانة,ياك بخير,كيصبحتي بخير هانيا
مثلا اهلان اسي حاج لباس.
مثلا صباح خير امعلم كيصبحتي بخير هانيا.
3-تسولي على أحوالو
اش خبارك , امور هانيا ,أش كتعاود ,كيمداير ,هانيين,كيغادي مع الدراسة أو العمل أو صهد أو برد (على حساب هو شنو تيدير فحياتو), أشمن شافك غبور هدي.
مثلا سلام أخالتي كيمدار بخير .
 4-تسولي على مالين الدار
واحد وليدة لباس عليها , مالين دار هانيين , الوليدات لباس,كلشي بخير,فلانة لباس عليها
مثلا  وليدات لباس كلشي بخير.
 5-تبليغ سلام
سلم على مالين الدار,بلغ سلامي,سلم على فلان,بلغ سلامي لفلانة
مثلا بلغ سلامي للحاجة.
6-الوداع
دوزي بخير ,خليتك على خير ,بسلامة,الله يعاون ,يالا بسلامة.
مثلا دوزي بخير ألالة فاطمة.
مثلا بسلامة أسي حسن.
مثلا إوا بسلامة أحاجة وتهلاي ليا فصحيحة.
جواب على صواب ملاقيا 
من ضروري في الصواب تفاعلي مع طرف اخر مشي غير تبقاي تسوليه هو بطبيعة الحال غيسولك نفس الأسئلة اجي نوريك اشنو غتجاوبيه.
1- باش غيسولك على صحتك غتقولي
-لاباس حمد هد ساعة الله يبارك فيك. 
- هانيا امور حمد الله بخير.
-حمد الله بارك الله فيك .
2- الا قاليك انا مريض
قولي ليه شنو ضارك والله يشافيك وباش تساليو هضر قولي ليه تهلا اخوي فراسك دب نطمئن عليك فتلفون.
2- تجاوبي على الا قاليك سلمي على شي حد
مرحبا بسلامك , مبلغ,يمسي عليك الخير. 
ملاحضة
 وبنسبة لشي لاخر كتجاوبي عليه بحال طرف اخر يعني مثلا قاليك بسلامة قولي ليه بسلامة.
*أمثلة*
*اهلان سي حسن اش خبارك لباس عليك.
*الو عبد حق خويا شخبارك لباس عليك صحيحا لباس ...بسلام اخويا بسلامة.
*سلام عليكم كيمداير اسي دريس وليدات لباس كلشي بخير بلغ سلامي للحاجة.
*سلام أخالتي كيمدار بخير كيمدايرا مع هد الصهد.
*صباح خير مريم كيصبحتي لباس عليك.
*احبيبتي اش خبارك كلشي بخير .
*اهلان اهلان سي حسن اشمن شافك سبحان الله دنيا صغيرة.
*اهلان اهلان سي حسن اشمن شافك سبحان الله دنيا صغيرة.
*اهلان لالة غيتة لباس صحيحة مزيانة مالين دار هانيين  اوا حمد الله.
*سلام عليكم كي بقيتو مزيان.صحتكم لباس نتمنى من ربي تكونو فأحسن الأحوال أسيدي ربي .
*صباح نور كي بقيتي لباس كيدايرا مع صحيحة.

هدا فقط الجزء الأول من سلسلة تعلم صواب راه كاين بزاف مواضيع بخصوص إتيكيت وتاويل المغربي.
:
-
-
-



↓↓↓↓ شارك هذا الموضوع عبر مواقع التواصل الأجتماعي ↓↓↓↓