-->

10/03/2019

كيفاش تكوني بنت قوية و واثقة من نفسك؟

مقولة موضوع اليوم "حب نفسك وقدسها دائما وأبدا فحب الذات لا يهزم"

حاجة لي خصك تعرفيه أ حبيبة هي الى كنتي بنت قوية و واثقة من نفسك راه كل شي غدي يحبك حيت حنا بفطرتنا البشرية نميل الى لأشخاص لي عندهم شخصية قوية و لي واثقين من أنفسهم.

*********************

نضرة الخاطئ عن ثقة في النفس

المرأة القوية ماشي هي لي كتكلم بصوت عالي و تقول كلام جارح و لا مستفزة ولا كتخسر الهضرة ومشي هي لي كتكلم بزاف على راسها .. بالعكس المرأة القوية هي مرأة واتق في قدراتها وامكانياتها ومواهبها و مأمنا بيهم هي لي راضيا بهدشي لي عاطيها الله و حامد الله عليه يعني من لخر مقدر راسها وعارف قيمتها "متصالح مع نفسها".

❤️❤️❤️❤️❤️❤️❤️❤️❤️❤️❤️❤️

    فرق بين الغرور و الثقة في النفس



بزاف الناس عندهم خلط بين الثقة في النفس و الغرور و يضنون أنه لو زادت الثقة في نفسك غتولي مغرورة بعكس راه هدا يسمى ابداع , وثقة بنفس درجات كلما زادت أصبحت مميز أكثر.

راه فرق كبير بيناتهم
*أول الغرور هو تشوف انك فوق عباد الله و بلي هم أقل منك ومتبغيش ليهم الخير وأن الناس مايستحقوش أي احترام او تقدير منك.

*علامة تانية للغرور هي تكون شخص كيتوهم الكمال وبلي مكيغلطش ومستحيل تعتارف بالخطأ ديالك قدام أي واحد وانك شخص واعر مكاينش بحالك وبلي نت كتعرف كلشي و بلي اي حاجة تقدر ديرها .

شعور بالعظمة + شعور بالكمال = الغرور

❤️❤️❤️❤️❤️❤️

ثقة النفس هي عضلة

أه ثقة بنفس هي عضلة وبضبط مركزها العقل وخصنا ديما نتهلاو فيها و نمرنوها و نخليوها قوية منغفلوش عليها.
دب سؤال الى غدي طرحي كيفاش تمرني هد العضلة وتكوني واتق من راسك ؟
❤️❤️❤️❤️❤️❤️

1-بغي راسك كيف مانتي

اول حاجة ولي هي مهمة بزاف هي تبغي راسك حبي راسك بجميع عيوبك من راسك لرجليك واخ يكون وجهك عامر حبوب كل حبوبة فوجهك حبيها خلي راسك ملئ بطاقة الحب الايجابية هضري مع جسد ديالك بطريق الايجابية خليه يحس بلي راكي كتبغيه راه معادلة الحب ساهل بغي راسك غيبغيوك ناس تقبلي راسك غدي يتقبلوك الناس .

"ديما قولي مع راسك الا مبغيتش انا راسي شكون غدي يبغيني"

*************

2- هضري مع راسك قدام المرايا (مرآة)


تعلمي تهضري مع راسك قدام مرايا ولكن بطريقة ايجابية قولي بصوت مسموع ليك انا بنت قوية انا زوينة انا نستاهل أي حاجة زوين أنا نستاهل الحب في حياتي المهم بقاي تهضري مع راسك ولا وقع ليك شي مشكل و حسيتي بالاحباط سيري وقفي قدام المرايا وقولي أنا قوية وغدي نوصل داكشي لي بغيت ...تجنبي نهائي تهضري مع راسك بطريقة سلبي عداك تبقاي تقولي تفو أنا منحوسة أنا معديش زهر هد دري لاش كيبغيني انا خايبة ...هد هضرة كامل كثأتر عليك نفسية بواحد طريقة خطيرة جدا حيت عقلنا باطني باش كيسمع هد هضرة منك صافي كيتيقها و كيبقا يجلب ليك حاجات في حياتك تخليك متأكد من هدشي.
************

3-وقفة superhero



في جلسات تصوير تاع مودلز كيحصل توتر وخوف لموديلز و كيديرو واحد طريقة سميتها superhero لي كتشحن بالطاقة الايجابية .
باش كدخل بنت و هي كتقوليه راني عييت صافي مبقيتش قادر كيقولو ليها تنفسي بطريقة صحيحة قراي هد موضوع لبغيتي تعرفي طريقة صحيحة للتنفس.
ومنبعد تيقول ليها وقفي وقفة girlsuperhero و (ضهرك مستقيم ويدك على خصرك كيف مافي صورة).وقولي انا قوية مزال نقدر .
هد الوقفة انا بغيتك تستعمليها باش تهضري مع راسك قدام المرايا (وقفي قدام مرايا وقولي انا واتق من راسي انا قوية و نتي كتشوفي راسك فمرايا بكل فخر) راه كتخليك تحسي بلي راكي قوية جربيها وردي عليا الخبار...غدي تعاونك بزاف كلما حسيت بضعف وتوتر ديري هد وقفة كأنها تشحنك بطاقة .
*****************

4-تقدير النفس


راه بطبيعتنا البشرية نبحت عن تقدير من ناس لي دايرين بينا بمعنى باش كنجحو فشي حاجة ولا كنديرو شي انجاز واح صغير تنبقاو نتسناو من ناس لي حدانا يقدرونا يكافئون ويقولو كلام زوين فحقنا ويباركو لينا ومحسو بالاهتمام حيت هدشي كيزيد من ثقة في أنفسنا .

ولكن الخطأ كبير لي كنوقعو فيه هو باش كنولفو هدشي و نهار لي كنديرو شي انجاز و مكيقدروناش الناس لي حدانا كنشعرو بالاحباط و تقتنا في أنفسنا كطيح لصفر وكنبقاوش قاديرن نجحو فحياتنا....هدشي لاش حل هو نتعلمو تقدير الداخلي باش نوليو قاديرن نستغناو على تقدير خارجي (لي هو التقدير جاي من الناس لي حدانا وهو منقدروش نتحكمو فيه عكس تقدير الخارجي).

*كيفاش نعلم راسي تقدير داخلي* 

قضية سهلة بزاف عملية لي غنديو هي غنوهمو عقلنا عن طريقة مبدأ "كافئ نفسك بنفسك " يعني لو عملت شي حاجة مهمة و لانجحتي فشي حاجة ...كافئ نفسك بشي حاجة عزيز عليك مثل شري لراسك حوايج شري لراسك شكلاط ولا سيري سافري عرضي على راسك لشي قهوة وشري لراسك اغلى ماكلة مهيم كافئ راسك...

بقا تولف راسك وقول الا درت هد حاجة ونجحت فيها غنشري لراسي ديك سبرديل غاليا وباش تنجح وتحقق داكشي تسلف وتكلف وشريها لراسك وبقاي توقفي قدام مرايا وقولي برافو عليك مبروك عليك امريم راكي واعرة تبارك الله عليك.... راه هد عملية لي كدير مهمة بزاف حيت كتلعب دور كبير فتقوية ثقة في نفسك .

تنويه :
في عيد ميلادك مثلا ولف راسك تشري شي حاجة لراسك ومتسنا من توحد يقوليك مبروك نتي فرحي براسك و بقاي تبوسي فراسك وقولي مبروك عليك راكي كبرتي .

****************

5-علاقتك مع نضرة وكلام الناس عليك


ما تبريرش لناس لخداو فكرة خيبة عليك خليهم ياخدوها ويمشيو
سيدي ربي مخلقكش باش تبين لناس راك ملاك ولا راك شيطان وكاين بعض أشخاص كيديرو هد تصرف باش يجدبوك نحوهم وتلاحضيهم.
متسوقش لأي حاجة تيقولوها ولا تيضنوها ناس عليك واحد النهار غادي تكتاشفي انك ضيعتي اجمل اوقات حياتك غير وانت تتحاول تبان زوين وتقاد صورتك قدام ناس وهادوك ناس اصلا متيشوفوش غير لبغاو هما هكا معنزين الله يستر .هد نوع منتشر بزاف في المغرب.
كل واحد فهاد الدنيا كيفاش غيشوفك ..كاين لغيشوفك زوين .. كاين لي مأدب ..كاين لغيشوفك فاشل .. كاين لغيشوفك ناجح ... كاين لغيشوفك نصاب .. كاين لغيشوفك كذاب .سيدي ربي بحدو لغادي يشوفك على حقيقتك فخلي حياتك كلها معلقة بالله .
ولجا عدك شي حد قاليك نتي خايبة قوليه ربي يخليك قاليك تنكرهك قولي ليه حتا انا وزيدي بحالك مطلبيش منو تفسير و لا سبب وراء هضرة عطيه نخالة و متعبريهش نهائيا .
مهيم خلاصة راه معمرك غادي تمنع ناس على الهضرة ولكن اكيد تقدر تمنع راسك من ثأثر بهضرتهم حيت مفاتيح عقلك بأيديك ماشي بأيديهم.

خلاصة :

ديري فبالك ديما الناس غيبغيوك يشوفوك قل منهم مشي حسن منهم هدشي لاش بلاما تصدمي من هضرتهم سلبية على أحلامك و عليك عادي تقبليها و متعطيهاش اهمية تدكر

***************

6-عرفي نقاط قوتك

أول حاجة خصكي تعرفي على شنو هي نقاط قوتك و بقاي ترجعي سينتا لور وتفكري فصغرك باش كنتي متميزة شنو حاجة ليكنتي كتقنيها كتعرفي ليها ولا كان تتجيك حياتك عادية سولي الناس لي حداك وبضبط المقربين منك حيت هما غيشوف نقاط قوتك حسن منك.
نعطيكم مثلا براصي انا فصغري كانو خوتي باش كيبغيو شيحاجة من عند بابا كيجيو عندي و تيقول ليا سيري هضري علاش زعما فنضركم؟حيت كنت تنقدر نقنعو من هنا عرفت بلي عندي قدرة على اقناع واخ كانت ضعيفة فصغر و لكن قريت علا كيفاش نقويه هدشي لاش خصكي تعرفي نقاط قوتك وتنميه حيت كيعتابرو دعامة قوية للثقة في النفس .

*******************

-متسمحيش فحقك-

القوة حقيقي هي متخليش حقك يضيع متسمحيش فيه متخلي حد يعايرك ولايستهزأ بيك خلي كرامتك فوق كل شيء , باش تعيشي معززة مكرم.
لبغيتي موضوع تفصيلي على هدشي نصحك تقراي هد موضوع
-كيفاش ندافع على راسي و منخليش حقي يضيع.
****************

7-وياكي تقارني راسك مع غيرك


اياك ثم اياك تبقاي تقارني راسك مع شي حد حيت باش كتقارني راسك معاه راكي كتقارني نقاط قوتك مع نقاط ضعفك وبتالي هدشي تيقلل تقتك بنفسك.
فهمتيني ؟ اجي نشرح ليك مثال عند مقابلة عمل مع بنادم نت كتبقا تشوف فيهم وتقول شوف هد زوين باين غيتقبل واو هدا كيعرف يهضر , هدا كيهضر ب5 لغات ....نت بهد هضرة كدير احباط لنفسك وكتفقد تقتك بنفسك.
دب بلاصت ما تبقا جالس وتركز على نقاط قوة غيرك ركز على نقاط قوتك نت وقول مع راسك انا واتق فراسي وفي قدراتي واخ يكون قدراتك قليل مقارنة مع اخرين كون واتق من نفسك ومخرج عينك وكيف ما تنقول حنى في المغرب خصك تكون مصنطح لبغيتي تنجح فحياتك كلشي بتصنطيح شحال من واحد مكيكون عارف والو ولايقارن مع أخرين ولكن غير بصنطيحة كيصدق هو لي مطفرو فيهم ههه .


****************

8-توقفي عن جلد نفسك


نساي الماضي صافي تقبليه خايب ولا زوين هدا ماضي ديالك نتي .
ولكن مشي تنسايه و متخديش منو العبرة تعلمي من اخطائك , راه الامقدرتيش تقبلي ماضيك راه عمركي غتزيدي قدام و تبقاي ديما متوتر و خايف تعاودي نفس اخطاء ماضي وهنا كدخلي في دوامة ضعف الشخصية

***************

9-عرفي نقط ضعفك وتقبليهم


خصكي دخلي لراسك واحد حاجة كلنا عدنا عيوب ومكاينش شي انسان على وجه الأرض معندوش نقاط الضعف كلنا بدون استتناء كنفشلو فشي حوايج مثلا مكتعرفيش طيبي تقبليها هد فكرة و افتخري بيها راه هديك نتي خصكي تبغي راسك كيف مانتي متكدبيش على راسك .
راه تقة بالنفس هي تكوني قادر تقولي انا فيا هد عيب انا منقدرش ندير هدشي بكل قوة وصراحة ومخايفاش من ردة اخرين أو بأحرى مكيهمكش رأيهم فيك.
قراي هد موضوع باش تعرفي نقاط ضعفك :

.***************

10-الصمت


لطالما كان سكوت مرتبط بحكمة والوقار هدشي لاش خلي سكوت يدير ليك واحد الهبية تعلمي تسكتي ولكن مشي أي سكوت قراي هد موضوع باش تعلمي فن الصمت.
*تعلمي فن الصمت
****************

11-التقافة و علاقتها بالتقة في النفس

بطبيعة الحال تقافة كتلعب دور كبيلاة في شخصية قوية ولكن مشي ضروري تكوني عالمة باش تكوني واتق من راسك سمعي مزيان كنتلقاو فحياة اشخاص كبار في السن و مقريينش و لكن عندهم شخصية كتحس بقوتهم ...عرفتي علاش ؟ حيت اختي هدوك كيكونو واخ عارفين معلومات قلال ومحدودين كيكونو واتقين في كلامهم وهضرتهم ومخرجين عينيهم لدرجة انكي نتي كتيقي هضرتهم واخ تكوني نتي اصلا ضد ديك هضرة كلشي على الثقة فراسك .
***************

12-مبادئ

مستحيل تكون شخصيتك قوية ونتي معدكش مبادئ تابتة وكدافعي عليهم خصكي ضروري تبحتي على مبادئ دياولك و تحطيهم قدامك وتخليهم واحد خط أحمر لايمكن تجاوزه .
قراي هد موضوع باش تعرفي شنو هما مبادئك و كيفاش تحافضي ودافعي عليهم :
*****************

13-طريقة المشي

المشية هي معيار شخصيتك عمرك تمشي محنية كي الفكرونة ديما هزي راسك وخليه بشكل افقي مع الارض و ضهرك خليه مستقيم و وسيري بهدوء ولكن مشي بهدوء بزاف تبقاي غادا وتعوجي سيري بثقة ونتي كتشوفي قدامك هد طريقة تاع مشية كتخلي أي واحد يقول هد بنت قوية راه المضاهر خداعة و كتخدع حتى دماغنا هدشي لاش بقاي توهمي عقلك بلي راكي قوية الشخصية.

تنويه : لي شاف فيك شوفة ناقصة متهربيش عينيك بالعكس خرجي عينيك (ولا كان شي تيتيز طبعا لا هبطي عويناتك خخخخخ)

***************

14-مضهرك خارجي

وياكي تستهزئ بمضاهر الخارجي راه كيلعب دور كبير في تقوية تقتك في نفسك و كتخليك تحسي راسك قوية هدشي لاش حافضي على نضافتك و لباسك يكون انيق مشي ضروري تشراي حوايج واعرين و لكن فقط يكون داكشي متناسق و كيمتل شخصيتك و لجا شي حد قاليك ستيلك فلباس مكيعجبنيش خرجي عينيك و قولي انا عاجبني و زيدي هدي هي تقة في نفس كتيقي فستيلك.

***************

15-أنا هي انا


خصكي تعرفي انه الا كنتي وسط واحد مجموعة من الناس لي زوينين بزاف ومميزين هدشي مكيقللش من تميزك ..راه تقة بالنفس مشي هي دخلي لشي بلاصة وتقولي انا اجمل وحدة هنا لا هدا خطأ هدا يسمى غرور ...تقة بالنفس الحقيقي هي دخلي لشي بلاصة وتقولي انا معنديش منافس ؟؟ غتجيك هضرتي فشكل كيفاش معنديش منافس.
راه باش غدي دخلي داك بلاصة غتقولي مع راسك انا مميزة ومكاينش شي حد بحالي كل واحد هنا راه صديقي و عدهم عيوب و المميزات كيف ما أنا ...بقاي تقولي انا مميزة أنا جدابة انا بجنن وانا هي أنا مميزة كيف مأنا بمميزات و بعيوبي و هما لي مخليين مميزة عن اخرين ومستحيل يكون شي واحد بحالي.
*************
↓↓↓↓ شارك هذا الموضوع عبر مواقع التواصل الأجتماعي ↓↓↓↓