✍كاتبة شيماء من مدينة خنيفرة
موضوع اليوم هو كيفاش ترجعي محبوبة, واللي شافك يتمناك تكوني زوجة او صديقة او عروس تتماناها اي ام لابنها.
اللي كتاشفت البنات هو بزاف لبنات اللي طالعين دبا عندهم كلشي... الزين والمستوى الدراسي ,الخدمة لفلوس, ولكن ماعندهمش الزهر كيفما يقولو اللي هو محبة الناس ,يعني البنت تلقاها تعرف تلبس وتماكي وتزوق ولكن ماتعرفش تكسب الناس او تخلي الولد , اللي قدامها ينويها لزواج , ماشي لتصاحيب و مضيعة الوقت ,ماتعرفش لتقنيات التعامل.
مهيم بلاما نقوي معاكم هضرة باش متملوش مني يالا ندخلو لصح لصحيح هه
أول المقادير:
-الابتسامة😊
-التباتة
-النعومة
-الخجل
-التواضع
-الوعي 📖
-الاحترام💎
-الحكمة🌳
-الصمت
تانيا الطريقة:
✅✅الثقافة والوعي 📖
باش تكسبي الاهتمام والابهار ديال الاخر بيك خص ضروري تكوني مميزة بافكارك , و أراء ديالك ونظرتك للحياة , وهادشي تكتاسبيه من القراءة بزاف والمطالعة.
حيت كاتخليك انسانة راقية, و عقلك واسع وعندك مايتقال ,وديما عندك الجديد والاجابة , ودراية بالدنيا والاخبار والحياة. وهاد النوع ديال لبنات كيعلم بزاف في الذهن ديال الاخر وديما يشوف فيك البنت الذكية الناضجة.
✅✅ الحكمة والتفهم (المسايسة او المساعفة)
متفهمة يعني كاتعدري وتسامحي وتفوتي وتميكي مكاتسوليش بزاف ماتحرجيش بنادم ماتنتاقديش بزاف , عارفة الحدود ديالك مكاتدخليش بزاف , كاتجنبي المشاكل وكاتخلقيهاش وهنا تسماي باللي داخلة سوق راسك خاطيك شبوقات.
✅✅النشاط😄 :
يعني ديما خالقة سعادة لراسك وجو ليك واللي معاك كاتضحكي.كاتقولي نكات كاتبسطي الدنيا في عينين الناس متفاءلة ديما تقولي الحمدلله.ديما تعطي امل وطاقة ايجابية مع اللي يكون يهدر معاك .يعني ماشي بنت اللي غير تبكي وتندب (ماعنديش زهر داروليا فعلوليا سحروليا.)
✅✅الادب والاحترام 👱:
كاتسلمي كاتقولي شكرا كاتعاوني اللي قصدك بالخير لباس ديالك محترم تحتارمي الناس.تحتارمي الاختلاف تحتارمي جيران وداياها في سوقك ماتهدريش بالخايب .واي واحد تجبد قدامك كاتقوليها فيه مزيانة وهاد النوع كلشي كايموت عليه حيت غا تسماي البنت المربية .
✅✅التزيين🎂:
اهم شيء فاش تبغي دخلي اي علاقة ضروري تفكري مزيانفي الهدف والسبب والافق ديال العلاقة.
يعني نقول فراسي هاد السيد شنو باغي . واش الى جا للدارنا واليديا غايقبلو بيه واش خدام واش مناسب ليا واش انا نقبل بيه كزوج . فين هو الافق ديال العلاقة واش زواج ولا تفلية شنو باغي مني واش غانضيع وقتي غير في الانتظار شنو الربح من هاد العلاقة حيت هاد الاسئلة ضرورية باش تعرفي شنو باغية وواعية بالخطوة اللي داخلة ليها وتكوني انسانة اللي واثقة وماشي ساهلة عندك هدف محدد من العلاقة وماشي اي حد يطيحك او يتصاحب معاك.
🌸رشة سكر:
شي مرات البنات كانلقاو بنات او زوجات تقولك انا راجلي كانبغيه وكانعطيه حقو في الفراش ونقية ومهتمة براسي وزوينة ولكن مكايديهاش فيا .او كايخوني هاد البنات اكيد نساو ان اللسان طيب كايكسب لقلوب وان التعامل الطيب والعشرة الحسنة هي كلشي . الانسان الا لقا صدر حنين كايخوي قلبو و اسرارو فيه بلا مايخافانكي تقلقي ولا تغوتي عليه و لاتعايريه بمشاكيلو .او عارف بالي فجنبو انسان ممكن يسمعلو ويفهمو بلا ما يعايرو او ينتاقدو فاكيد غا يكون ملكوه للابد.وهدا هو السكن اللي هدر عليه رب العالمين في القران حنا ديما محتاجين شي حد نتيقو فيه محتاجين شي حد نعتامدو عليه فاكيد منين نجيو نختارو، غا نختارو تباتة رزانة ولعقل و الطيبة والاحترام اللي يفهمنا ومتواضع معانا .
خلاصة 💖
اكيد جمال الوجه و المظهر عنده دور ولكن جمال العمق عنده بصمة وبعد وتأثير كبير.